Getxoko (Bizkaia) Itzubaltzeta auzoko dozenaka auzokide Lope de Vega kalean bildu dira gaur goizean, bertako eraikin bat eraitsi ez dezatela eskatzeko; hain zuzen, udal euskaltegia eta nagusien etxea dauden eraikina. Beharginak atzo hasi ziren lanean, eta, hori ikusirik, hainbat auzokidek protestara deitu dute. Eserialdia egin dute errepidean, langileak eraikinean sartu ez zitezen, 08:30 inguruan. Ertzaintza agertu da horren ostean, eta protesta egiten utziko zietela esan die, betiere langileek eraikinera sartzeko aukera bazuten. Sarbidea galarazten saiatu badira ere, azkenean herri harresia desegin du Ertzaintzak, eta foru aldundiak bidalitako langileak 10:00ak aldera sartu ahal izan dira eraikinean. Ertzainek kalea zigilatu dute jarraian, jende gehiago gerturatu ez zedin.
Protestan ziren auzokideak eraikina inguratzen duen hesia jotzen hasi dira, eta hainbat xafla botatzea ere lortu dute. Hala, ertzaintzak gazte bat atxilotu du, baita zenbait lagun zauritu ere. Horien artean zen Hiruka komunikazio taldeko kazetari bat, eta besoan jo dute, protesta grabatzen ari zela. 12:00ak inguruan, brigada mugikorreko beste furgoneta bat gerturatu da, foam jaurtigailuekin. Kalea itxi dute.
Arratsalderako, elkarretaratzera deitu dute bizilagunek, goizean gertatutakoa salatzeko. Santa Eugenia plazan bilduko dira, 19:00etan.
Itzubaltzeta/Romoko #LopedeVega kaleko 12 zenbakiko eraikinak babestearen aldeko protesta jarraitzen ari zela, #Ertzaintza@HirukaEus taldeko lankide baten kontra oldartu da bere lana egiten ari zela, bideo honen amaieran ikus daitekeenez pic.twitter.com/RnjxYViW94
— Iker Rincon (@irincon_) February 14, 2023
Lope de Vegako eraikina botata, belaunaldien arteko zentro bat eraikitzea da Bizkaiko Foru Aldundiaren asmoa —zentro horretan adin desberdinetako pertsonak biziko dira elkarrekin; gazteentzako 40 etxebizitza eta mendekotasun egoeran dauden adinekoentzako ehun leku izango du—. Joan den abuztutik darama eraikinak itxita. Urtarrilaren amaieran hustu zuen Getxoko Udalak, eta duela aste bat utzi zuen aldundiaren eskuetan. Proiektuak 16 milioiko aurrekontua du, eta 20 hilabete iraungo dute obrek. 2024rako amaituta egotea aurreikusten dute.
2020an sinatu zuten Getxoko Udalak eta Bizkaiko Foru Aldundiak belaunaldien arteko zentroa eraikitzeko lankidetza hitzarmena. Udalak bere jabetzako lursaila utzi zion lagapenean aldundiari, proiektua 75 urtez garatzeko.
Protestan ari zen gazte bat atxilotuta eraman dute, beste horrenbeste kolpatu eta @HirukaEus taldeko lankideari berriro ere oldartu zaio Ertzaintza.
— Hiruka (@HirukaEus) February 14, 2023
Argazkilariari borragaz kolpe handia eman diote gertatzen ari zena kontatzeagatik, behin eta berriro #kazetari zela esanda ere. pic.twitter.com/Fwg3Pw98Ny
