Albistea entzun

BIRA

Jolasgaraia

Garbine Ubeda -

2015eko apirilak 11

Neskatoak datorren ikasturtean eskola aldatu beharko duela eta, zentro berriko informazio bilerara jo du aita arduratsuak. Zenbait azalpen eman eta bideo lagungarriak erakutsi zaizkielarik, gurasoei eman die hitza zuzendariak. Aita arduratsuari bideoan ikusitako gauza batek eman dio arreta, pilotan eta futbolean mutilak besterik ez dela ageri, hain zuzen ere, eta alabaren gustuak ezagututa, galdera bat pausatu du urduri: «Aurreikusi al duzue neska-mutilak elkarrekin aritzeko ekintza positiborik?».

Irakasleen ordezkariak «ekintza guztiak bazterketarik gabe antolatzen ditugu» erantzun du tinko, eta ezpainak estututa, gaineratu: «Atseden garaian askatasun osoa dute nahi dutenarekin jolasteko». Beste aita batek, semea baloizale amorratua dela garbi utzita, «Horixe bera, askatasuna!», aldarrikatu du pankarta beharrik gabe. Futbolak Hautespen Naturala eskatzen duela argudiatu du libertatearen izenean, «baita mutilen artean ere», eta beste bi galdera otu zaizkio aita arduratsuari, harenak aditu ostean. Bat: Horri askatasuna deitzerik ba ote dagoen. Bi: elitismo hori jolasa ala besterik ote den, bazterketarik onartzen ez duen eskolako jolasgaraian. Baina ez du txintik atera, futbolzale amorratuak publiko zabalaren onespena jaso baitu.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.