Albistea entzun

LARREPETIT

Maiatzekoa

Danele Sarriugarte -

2015eko maiatzak 1

Iaz konturatu nintzen estreinako aldiz, maiatzaren bata pasatu eta gutxira suertatu baitzitzaidan Amaren Eguneko telebista-iragarkiei izkintxo egitea, eta neure buruari esan bainion irribarrez: kontxo, kontxo, amarena eta langilearena bata bestearengandik ezin gertuago daude-eta! Kasualitatea, gero!

Ez dizuet gezurrik esango, neure filiak direla medio, nahiago izaten dut inguruko andreak oro martxoaren 8an zoriondu edo, areago, horiekin batera martxan kalera irten (gainera, aurten atera zaigun eguzki hordigarriarekin), baina ezin nuen bestela bezala baztertuta utzi probidentziak zekarkidan aukera paregabea, urte luzez ikusezina izan den lan hori guztia ageriko egiteko, nazioarteko egunen gurpila baliatuta, eta egutegia, eta euskal kantutegia.

Hortxe etorri zitzaizkidan-eta, plast, lana eta ama bat eginda, Joxan Artzeren lerro horiek Mikel Laboaren ahotsean, ama hil zaiola, lanak itota, zertarako den bizitza jakitera iritsi gabe, eta batek pentsa lezake, bueno, ama jakin bat da hori, bateko ala besteko arrazoiak direla medio zendu zena lanak akabatuta, ez gaitezen orokortzen has; baina, hara non izeba ere hil den, era berdinean ere hil izeba. Eta hemen bai has gaitezke susmatzen, akaso, etxeko lan horien guztien zamapean ito direla bi-biak, andreen bizkarrek hartu izan dituzten lan horien ondorioz, soldatarik eza eta naturalizazioaren derrigorra, besteak beste, heriozko kolpe.

Ahoz aho darabilgun honetan subjektu eraldatzailea birpentsatu beharra, kezkatzen gaituen honetan zer aldarrikatua luketenak baino askoz lagun gutxiagok egingo dutela bat gaur kalean antolatutakoarekin, oraindik ere Gilen eta Antonen mahonezko irudiekin estuegi lotzen dutelako langile izatea, ez litzateke pausorik txarrena babak musu-truk eltzeratzearekikoak Amaren Egunean hitz kamutsez kitatu baino gehiago, maiatzaren hastapeneko leloetan lehen mailako egitea.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...