50. Durangoko azoka

Euriak bisita egin dio azokari azken egunean, baina bada giroa Landako Gunean oraindik. Arratsalde oparoa antolatu dute azokari amaiera emateko: euskal kulturaren prestigioaren korapiloaz arituko dira hizketan Harkaitz Cano idazlea, Aizpea Goenaga Etxepare Euskal Institutuko zuzendaria eta Asier Mendizabal artista 18:00etan, Gorka Erostarbek gidatuta. Ordu berean, film laburren lehiaketako sariak banatuko dituzte, eta Szenatokian Zirko Anabasa eskainiko dute. Amaitzeko, Plateruenan Korrontzi taldea izango da zuzenean.

AZKEN EGUNA: BAGA-BIGAREN BALORAZIOA

Baga-Bigakoentzat ere egun bat gehiagok ez die salmenta gehiago eman, baina gustora daude lortutako emaitzarekin. Iazko kopuruetara iritsi dira. ETS En Tol Sarmiento, Txapelpunk eta Korrontzi izan dira erosienak aurten.

AZKEN EGUNA: MUSIKA ZUZENEAN BALORAZIOA

Guztira 45 disko jarri dituzte salgai, eta denetatik saldu dute; arrakasta izan dute JP Lohian eta Afu.

AZKEN EGUNA: BIDEHUTSEN BALORAZIOA

Anari Alberdi aurkitu dugu Bidehutseko saltokian; bere ustetan ibili da jendea aurtengo azokan, eta salmentak ondo joan dira: Jupiter Jon, Nire, Anari eta Joseba Irazoki izan dira salduenak.

AZKEN EGUNA: SUSAREN BALORAZIOA

Susako arduradunentzat literaturaren artxipielagoa da Durangoko Azoka; argitalpen berrienak izan dira erosienak, batez ere Harkaitz Cano eta Gotzon Barandiaranen aurtengo eleberriak.

AZKEN EGUNA: PAMIELAREN BALORAZIOA

Pamiela argitaletxean Joseba Sarrionandia eta Bernardo Atxaga izan dira arrakastatsuenak. Jende kopurua bareagoa izan dela nabaritu dute bertako arduradunek ere. Bestalde, Jon Sarasuaren Bost truke eleberria ondo saldu dela nabarmendu dute, liburua aurkezteko astirik izan ez arren.

AZKEN EGUNA: ELKARREN BALORAZIOA

Elkarrek ditu saltoki kopuru gehien, eta salmenta handiak egin ditu liburu eta diskoen artean. Bost egunetan banatuta, aurten azoka lasaiagoa izan dela nabaritu dute Elkarreko arduradunek. Liburu berrienak izan dira salmentetan arrakastatsuenak, batez ere Imanol Muruaren Ekarri armak eta Jasone Osororen 12etan bermuta. Diskoetan berriz, Ken Zazpi eta Mikel Urdangarin izan diras salmenta gehien izan dituztenak.

AZKEN EGUNA: EREINEN BALORAZIOA

Pozik daude Erein argitaletxeko arduradunak. Haiek izan dira jende ilada luzeena izan dutenak bost egunetan, Toti Martinez de Lezea idazleak sortutako ikusmirari esker. Hain zuzen ere, Martinez de Lezearen liburuak saldu dira hobekien: arrakastatsuena 'Y todos callaron' bere azken lana izan da. Euskarazkoa ere ondo saldu da.

Azken eguna: balorazioa

Azokan bost egunez saltokietan etengabeko lanean ibili dira argitaletxe eta diskoetxeetako langileak. Haiekin hitz egiten egon gara, eta denek antzeko emaitzak izan dituzte 50. Durangoko Azokan. Azokak egun bat gehiago izan duen arren, salmentak ez dira igo, eta iazko emaitza berdinak izan dituzte, salmentak mantenduta. Orokorrean, aurten aurkeztutako liburu eta diskoak saldu dira hobekien. Dena den, azokak egun bat gehiago izateak eman du abantaila bat; ez da jende pilaketarik egon,eta horrek asko lasaitu du azokaren egunerokoa.

Euskal kulturaren prestigioaz ari dira Jon Maya dantzaria eta Ruper Ordorika abeslaria, Gorka Erostarbe kazetariaren gidaritzapean. Mayaren esanetan, erakunde eta komunikabideek espazio txikia eskaintzen diote kulturari, eta modu arinean lantzen dute; Ordorikak adierazi du euskaldunek zama handia hartzen dutela euskal kultura babesteko, baina erakundeek gutxi egiten dute bere ustetan.

Andoni Egaña bertsolaria eta Xabier Lizaso musikaria elkarlanean aritu dira Ahotsenean.