Ez da izanen

jada ez

ez gara elkarrekin biziko

ez dut zure umea heziko

ez zure arropa josiko

ez zaitut gauez izanen

ez dizut musu emanen ni joatean

ez duzu inoiz jakinen nor nintzen

zergatik maitatu ninduten beste batzuek.

Ez dut sekula jakinen

zergatik ez nola inoiz ez

ez egiazkoa ote zen

hala zela esan zenuen hura

ez nor izan zinen

ez ni zer zuretzat

ez nola izanen zen

elkarrekin bizitzea

elkar maitatzea

elkarri itxoitea

egotea.

Jada ez naiz ni besterik

betiko eta zu

jada

ez zara niretzat izanen

zu baizik. Jada ez zaude

etorkizun batean

ez dut jakinen non bizi zaren

ez norekin

ez oroitzen ote zaren ere.

Ez nauzu inoiz besarkatuko

gau hartan bezala

inoiz ez.

Ez zaitut ukituko atzera.

Ez zaitut ikusiko hiltzen.

Idea Vilariño

Itzulpena: Garazi Arrula

Irudia: Martine Audet

Iraganik gabeko jendea maitatzea posible balitz bezala.

Iñigo Aranbarri

Irudia: Arthur Humeau

Joseba Otondo, Joanmari Larrarte eta Miren Agur Meaberendako.

Badakit zeintzuk diren arrastoak uzten dizkidaten gauzak.

Batzuetan esan gabeko hitzak dira.

Besteetan telefono deiak desorduetan.

Elurteak.

Zauriak seinalatzen dizkidatenak.

Ez dakit ze arrasto uzten dudan besteengan

beti nabilelako hautatzen nire begiraden esanahia.

Arrangura ezkutatzeko begiak dira nireak,

ezin asmatuzko kolore batekoak.

Zer garen.

Zer izan gintezkeen.

Zer izango garen.

Nik ez dakit

horri buruz zer esan.

Baina badakit ederra dela bakardadea zuekin,

motz jandako larrea dela gurea,

hemen geratuko nintzatekeela, ahal izatera.

Ez naiz isiltasunean hondoratzen den horietakoa,

baina hitzen bila abiatu beharko nuke,

fereken bila, gorputzik banu,

belagaietara itzuli.

Neurria hartu bilatzen dudanari,

eta, hain zuzen, hori eskaini zuei.

Maitasuna da ezkutatu ezin daitekeen gauza bakarra.

Beti egon da hor.

Beti egonen da hor.

Dena galdutzat emanen dugunean ere.

Castillo Suárez

Irudia: Magnetika

Ez daukagunaren hutsunea lagun benetakoek betetzen dute. Umetan, kaligrafia-atazetan marra etenak birpasatu ahala ikurrek zentzua hartzen zutenean bezala, hautematen ari naiz bakardadearen eitea: zehatza eta garbia da, egiaren ordu ankerraren oskola eta askatasunaren plazenta.

Miren Agur Meabe

Irudia: Mari Carmen Goikoetxea “Goiko”

Sarritan eguzkitan ere

itsasertzetik pasieran

udako egunik erraz eta argienetan

pentsamendu ilunak darabiltza

gogoan ibiltariak

goragalea soseguaren ordez

esker txarreko amorrua

etsaien kontra

lagunen kontra

hurkoen kontra

sasoiz kanpoko kolera

egun ezin urdinagoetan

eta bakea soilik zeruertzean dago

eta higatzen edo harrapatzen

ez diren gauzen artean:

airean, zerruan, argian,

kalatxorien eta aparraren

eta seme-alaben irultza eroan

bizitzaren alde

izatearen alde

iraun behar duenaren alde.

Jon Gerediaga

Irudia: Da Kraplak

Lotarako etzaten naizenean urek presatik behera egiten dituzten jauziak entzuten ditut. Batzuetan ni ere jartzen naiz leihoan, eta errekari begira egoten gara. Zure kamiseta daramat jantzita. Lepoan musu eman dizudanean ez duzu begirada aldatu, baina ez nau etsiak hartu. Nahi dudalako nago hemen.

Promesarik ezean, min eman eta min hartzeko egunak dira niretako hauteskunde kanpainak.

Castillo Suárez

Irudia: Flavio Gasperini

Desberdintasunaz ohartzen gara lehendabizikoz.

Lore hau ez da ni bezalakoa. Elikatzen duen hanka bakar baten gainean bizi da.

Nik bi ditut eta urrats bakoitzean

lurretik erauzten naute.

Natalia Litvinova

Itzulpena: Castillo Suárez

Irudia: Anajoxe Errondosoro

Maite zaitut

ez duzulako nire iragana ezagutzen,

ez duzulako nire orainaz jakin nahi

eta ez zarelako nire etorkizunean egongo.

Izan ere, zure adinarekin

inork ez du bihotza osorik gordetzen,

eta nirearekin badakit

sexuak beti eramaten gaituela

okerreko tokietara.

Pinu beltzak dituzu begien hondoan;

nik prozesionaria habia bat umetokian.

Castillo Suárez

Irudia: Koldo Torrea

Emakumetasunean

amatasunean

galduak,

libertatearen ordez

segurantzari helduak.

Ez emakume

ez ama

ez eme

ezin izanik,

igarotzen genituen

geure egunak.

Amaia Lasa

Irudia: Daiga Ellaby