Aldi konplexu batean bizi gara, eta aldi hau ulertzeko inoiz baino beharrezkoagoa da kazetaritza. Bizi garen aldi hau ulertzen, mundua eta Euskal Herria ulertzen lagunduko digun kazetaritza bat behar dugu. Zer gertatzen den begirada propioz aztertuko duen kazetaritza bat. Garaian garaiko erronkei erreparatuko dien kazetaritza bat: feminismoaren begiradaz, gutxituen eta baztertuen begiradaz, klima larrialdiaren begiradaz, euskaldunon begiradaz… Euskal Herritik eta Euskal Herrirako sortutako kazetaritza landu bat behar dugu, kalitatezkoa eta fidagarria, jendearen behar eta kezkekin lerrokatua. Euskaldunok eguneroko bizitzari aurre egiteko eta mundua ulertzeko informazioa emango digun kazetaritza bat behar dugu. Independentea izango den kazetaritza bat, menpekotasunik gabea, sentsibilitate guztiei leku egingo diena.