Gaitze
'Gaitze'
Diskoetxea: Discos Enfermos.
Azpeitiko Karkaba bandako bi kide ohik abiatutako egitasmo hardcore-punka da Gaitze. Hirukotearen estreinako lana da hau, eta 1980ko hamarkadako hardcore eszenatik edaten duten bederatzi ukabilkada biltzen ditu. Bi ahots urratu eta amorratuk txistukatutako minutu eta erdiko gonbitoak dira, erritmo mozketa ugarirekin josiak eta hitz zuzen eta gordinekin osatuak; oso tarteka, pasarte geldoak ere ageri dira. Bi abeslarien arteko uztarketa dela eta, Europako hardcore taldeak datozkit burura; esaterako, kultuzko talde bihurtu den Gironako HHH. Erraietatik atera den abiadura handiko tren batek eragin dezakeen energia bortitza islatzen du diskoak, gorrotoz betetako testuek bultzatuta. Estilo oldarkorren zaleentzako kabiarra da.
Iruzkinak
Ez dago iruzkinik
Ordenatu