1. Puntu eta koma egoki darabilen norbait topatu.
2. Anomalia horretan serio fokuratu.
3. Bortizki maitemindu.
Hori da plana.
Anbizioaren txoria
Hauxe da, beraz, kontua:
insomnioa goizeko hirurak eta laurdenetan,
eguzkiaren orenari jarraitu arren
hamabost minutuero ziztada elektrikoa
pairatzen duen igela nola,
halaxe erlojua bere mekanikari bultzaka.
Hitzen aferak nauka esna.
Kakao-esnea edaten dut
—amatasun beltzaran epela—.
Nahiago nuke bizimodu sinplea,
baina gau osoa daramat
kutxa handi batean poemak pilatzen.
Nire Hilezkortasun Kutxa da,
nire gordekina,
nire hilkutxa.
Anne Sexton
Itzulpena: Harkaitz Cano
Irudia: Kendal James
Bakardadea
Iluntzen duenean
beti behar izaten dugu norbait ondoan,
bakardadea bada ere.
Castillo Suárez
Irudia: Anajoxe Errondosoro
EAEko hauteskundeak aurreratu?
Eusko Legebiltzarrerako hauteskundeak aurreratuko ote dituen Iñigo Urkullu Jaurlaritzako lehendakariak, horretaz zeozer aipatu du asteon Josu Erkoreka bozeramaileak, eta, “momentuz, ez”, esan zuen atzo Urkulluk berak. Arnaldo Otegi EH Bilduko koordinatzaile nagusiak hilaren 17an BERRIAn: “Uste dut Urkulluk [hauteskundeak] aurreratu egingo dituela. Ez harritu urte honen bukaeran legebiltzarra desegiten badu”. Atzera joz, 1980an EAEko bozak egiten hasi zirenetik, aurreratu-aurreratu, hiru aldiz egin dituzte: 1986an (urtebete eta hiru hilabete), 2001ean (urtebete eta bost hilabete) eta 2012an (bost hilabete). Lehen bietan, lehendakaria EAJkoa zen: Jose Antonio Ardanza (1986koan) eta Juan Jose Ibarretxe (2001ekoan); 2012koan, PSE-EEkoa zen: Patxi Lopez. EAJko lehendakarien aurreratze elektoralen kasuan, 1986koan alderdiaren zatiketak eragin zuen, eta 2001ekoan Lizarra-Garazi akordioaren haustura garaia zen. Ikusiko orain Urkulluk (EAJ) aurreratuko dituen ala ez; berez, urte eta erdira lirateke, 2020ko irailean. Aurreratuko balitu, orain arrazoia ez litzateke alderdi barruko afera edo testuinguru politiko berezia, baizik eta kudeaketa: EAJ, PSE gobernukidearekin batera, gutxiengoan dago legebiltzarrean (75 aulkitik 37 dituzte —28 eta 9—; bat falta), eta horrek sortzen dizkio arazoak. Urkulluk / EBBk aurreratzen badituzte, seguru EAJ-PSE gehiengo osorako aukera ikusten dutela.♦
Orkatza
[Fernando] Mendiak orkatz bat du gogoan. Aurretik ikusia zuten bazter haietan, bi kumerekin. Sutearen egunean, orkatza ikusi zuten urrutian, erredura handiekin. Sutatik ihes egin beharrean, kumeen bila jarraitu zuen. Hamalau egun geroago beste norbaitek ikusi zuen, kumeen bila jarraitzen zuen. Hil egin zen, erredurengatik.
Iker Tubia
Irudia: Jon Zufiaurre
Esporak
Aitortzen ez ditudan gauza guztiekin
egiten dut lo.
Iratze-sailak zeharkatu nahiko nituzke
ametsetan,
eta ni ere loratuko ez naizela esan
nire baitako gizonei.
Esporak utzi izaren artean
hatzak
nire sexuan sartzen dituzten bitartean.
Behar ditudala esan
lingua franca batean,
denek ulertzeko moduan.
Bezperako arropa jantzi.
Nagoen tokiaren
eta egon nahiko nukeenaren arteko distantzia da
bakardadea.
Castillo Suárez
Irudia: Anajoxe Errondosoro
Elkarrekin
Arrotza egiten zait zure mundua
nirea antzeko egiten zaizu zuri.
Gutxi dira bata bestearekin
partekatzen ditugun interesak.
Eta, hala ere, bada zerbait
elkarrenagana erakartzen gaituena.
Bizitzak emandako aukeratzat zauzkat
berdintzat naukazu zuk ni.
Uste dut hori dela maitasuna.
Juanjo Olasagarre
Irudia: Matthew Henry
Elur maluta
Badira elur maluten gisakoak diren pertsonak.
Ederrak, hotzak, gu ukitutakoan desagertzen direnak.
Castillo Suárez
Irudia: Monika Etxebarria
Zutaz mozorroturik
badakit
orduak zaborretarako
biltzen dituen hori naizela
atzokoa
eta ez gaurko hori
badakit
nigandiko hoberena
ez dagoela nire baitan
bidenabarrean baizik
badakit
nire baitako txarrena
nerau naizela
baina danbatekoa joz
alde egin zenuenetik
zutaz datorkit mozorroturik ia beti.
Juanjo Olasagarre
Irudia: Fátima Fuentes
Zeremonia
Ez dakit zergatik bukatu behar duten bikoteek
hain solemneki.
Hitz egin egin behar izaten omen da,
dena argi uztearren.
Psikodrama ederrak sortzen dira horrela.
Hilkutxei prezintoa jartzea edo antzeko zerbait
gorpuak bere terrariotik
korrika ihes egin ez dezan.
Telefonoa.
Non? Ondodaubostetan.
Bilbon izan zela uste dut. Seietan.
Peta bat egin genuen.
Eguzki izpiek betiko trapezio horixka
marrazten zuten barran.
Berak soberan zekien zergatik zen krisi hura azkena:
ez zitzaizkion gustatzen
ileak komunean
edo musikaz hitz egitea ideiarik gabe.
Nik ere antzeko sentipen
usteldu bat neukan.
Nik ere gorroto nuen maite ez nuenean.
Ez zitzaidan gustatzen bere omnipotentzia
bere autosufizientzia eta afirmatibitatea
eta batez ere
nire lagunik onena ligatzeko zuen obsesio hori.
Baina isiltasuna deserosoa da.
Bere burua defendatu ezin zuen bakarrari
bota genion errua:
maitasuna zein konplikatua den komentatzen hasi ginen.