Enekoitz Esnaola

Kategoria: Gauza txiki batzuk (Page 1 of 3)

Gauza txiki batzuk (18)

Euskal presoak. ETA armagabetuta, gatazkaren ondorioetan euskal presoen —eta iheslarien eta deportatuen— auzia dago konpontzeko nagusiki. Ekinbide sorta dator: bakegileek plan bat aurkeztu dute gaur Luhuson, Foro Sozialak etzi Iruñean martxoko jardunaldien ondorioen berri emango du, EPPK-k uztail bukaera aldera jakinaraziko ditu bere eztabaidako ondorioak, Ipar Euskal Herrian udazkenean egingo dute foroa… EAJk “diskrezioa” eskatzen segitzen du, Aitor Estebanek BERRIAko elkarrizketan zioen bezala; “ari gara [Madrilekin hizketan], baina bueno… Datorrenean badator, eta datorrenean hitz egingo dugu”. Euskal eragileekin ere ari da hizketan EAJ.

Ahal Dugu. Ahal Dugu-k alderdian izena emanda dauden —”militanteen”, deitu die— errolda osatu nahi du, udalerrietan —gehiago— egituratzeko asmoz. Bi urte bakarrik falta dira hurrengo udal —eta foru— hauteskundeetarako. 2015ean, udalerrietan ez zen Ahal Dugu modura aurkeztu, plataformen bidez baizik, eta ez inondik inora udalerri denetan, gainera. Agian, bi urte galdu ditu.

EA. Arazoak EA barruan. Batekin eta bestearekin hizketan, eta kritiko batek galdera txokantea bota du: “Guk aurkeztuko dugu zerrenda. Besteek?”.♦

Gauza txiki batzuk (17)

Herri galdeketak (I). Datorren igandean, beste 52 udalerritan herri galdeketak. Aurtengo lehen sorta martxoan izan zen, ondorengoa apirilean, eta, oraingo honen ondotik, udara arteko azkenekoa ekainekoa izango da. Lau olatu horietan, 129 udalerritan galdeketak. Erraz esaten da. Zaila egiten. Egin(go) dute. 2014ko eta iazko 38ekin, ekainaren 18ra artean, beraz, 167 udalerritan galdeketak; Euskal Herriko udalerrien %24tan. Bihar zortzi, denera 100.000 botoemaileren langa gaindituko dute; jarri haiek banan-banan ametsen etorbidean…

Herri galdeketak (II). Domekan, besteak beste, Durangon izango da galdeketa. Han bizi da Iñigo Urkullu, han dago erroldatua. Apirilaren 2an, Jose Antonio Ardanzak eman zuen botoa Sukarrietako Kanala auzoan, baina lehendakari ohia da, jakina… Urkullu gaur Estibalizko Ama Birjinaren ohoretan egindako ekitaldira joan da; bihar Espainiako Balore Merkatuaren Batzorde Nazionalaren presidentea eta EBko Eskualdeetako Komitearen presidentea hartuko ditu.

Nafarroa. Geroa Baiko, Nafarroako Ahal Dugu-ko eta PSNko gazte taldeek elkarretaratze bat egin dute gaur, Iruñean, PP “ustelaren” egoitzaren aurrean. Erne pista txiki horri 2019ko maiatzeko bozetarako. Geroa Baik desio lukeen formula bat da. PSN zerbait aldatzea nahikoa Ahal Dugu ere berotzeko. Baina zenbakiek eman behar.

Gauza txiki batzuk (16)

Aberri Eguna. EAJk —eta haren parrokiak— Aberri Eguneko bere ekitaldiari buruzko txioetan #AberriEguna traola erabili du, eta Independentistak sareak —eta haren inguruak—, #AberriEguna2017. Mundu zabaleko euskaldunentzako (ere), halako zera batean ere batasun irudirik ez. Izan da txiolaririk bestaldean kokatu dena: despistea hain segur, ez transbertsalitatea…

Jonathan Powell. ETAren indarkeriaren bukaera prozesuarekin Espainiako Estatuak daukan jarrera deitoratu du Jonathan Powellek, Baionakoaz geroztik, Financial Times-en eta El Pais-en. Lerroartean galduta badator haren beste esaldi bat, kontuan hartzekoa: “ETAren desegitearen amaiera desiratua urte bukaera baino lehenago heldu liteke”. Desegitea, urte bukaera. Euskal Herriko gatazkaren konponbidean ere bada nor Powell. Duela hamar urte ja bazebilen hemengo kontu hauetan, indar handiz.

Oscar Rodriguez. Espainiako Estatuan politikak gero eta atxikimendu txikiagoa izatearen arrazoiez tesi bat egin du Oscar Rodriguez PSE-EEko legebiltzarkide ohiak. Atera duen ondorio bat da politikariek meriturik egin gabeko eta gaitasunik ez duten afiliatuak eta senideak kargu instituzionaletan jartzen dituztela. “Hiritarrek normaltzat hartzen dute hori”. Arabako PSEn ildo ofizialaren aurkako mugimendu batean parte hartu zuen orain bost urte Rodriguezek, politika egiteko modua berritu nahian-edo; galdu egin zuen.♦

Gauza txiki batzuk (15)

Xabier Arzalluz. Datorren igandean EAJk Iruñeko 1977ko Aberri Batzar “historikoa” gogoratuko du, Barakaldon (BEC, 12:00). “Alderdi jeltzaleak publikoki egin ahal izan zuen lehenengo Aberri Batzarra izan zen. Altxamendu militarraren eta Gerra Zibilaren osteko diktadura frankistaren 40 urte luzeak amaitu eta gero egin zen”, dio EAJren oharrak. 1977ko hitzorduko protagonista nagusi batzuek solasaldia egingo dute BECen; tartean, Xabier Arzalluzek, aspaldiko partez. Haren beste hiru solaskideak: Iñigo Agirre, Josu Bergara eta Kepa Sodupe.

ELA-LAB. Apirilaren 26an Xabi Anza ELAko Manu Robles-Arangiz Institutuko lehendakariaren eta Ainhoa Etxaide LABeko idazkari nagusiaren arteko solasaldia izango da, Azpeitian (Sanagustin kulturgunea, 19:00), bertako Gure Esku Dago-k antolatuta. Ea antzematen den baden-ez gerturatzerik bi sindikatuen artean.

Herritar Batasuna. Herritar Batasunak web helbide berria du: herritarbatasuna.eus. Gaikako bideo batzuk igotzen ere ari da sarera; hizlarietako bat, Nekane Jurado, aurrekontu publikoez.♦

Gauza txiki batzuk (14)

Ibarretxe-Mas. Gure Esku Dago-k bazuen zalantzarik Kursaaleko 600 laguneko aretoa beteko zen Ibarretxe-Mas hitzaldirako. Joan den asteazkenean hilaren 22ko saioa iragarri eta ordu gutxira 700 lagun zeuden izena emanda. Atzo eguerdian, mila. Beraz, Kursaalean 1.800 laguneko aretoa hartu ala milarentzat areto bat egokitu, horretan dabiltza Agirre Lehendakaria Center eta biak. Bihar-edo esango dute.

Torturak. Joan den larunbatean jakin zen martxoan epaituko dituztela lau guardia zibil, Sandra Barrenetxea torturatzea egotzita. Paco Etxeberria auzi medikuak iaz, Tortura: 1960-2013 ikerketaren aurkezpenean, 1985eko istorio bat kontatu zuen: orduan beste lau guardia zibil epaitu zituzten, lesioengatik, eta epaiketan parte hartu behar zuen auzi medikuetako bati lehergailu bat jarri zioten autoan; “gaur, lasai esan dezaket: guardia zibilen lagunek jarri zuten lehergailu hura”.

Espainiako Auzitegi Nazionala. Teresa Todarena da gogoetarako esaldi hau, Auzitegiaren behatzaileak artikulua lantzean esandakoa (ez genuen sartu): “Auzitegi Nazionalean libre ateratako euskal herritarrek behintzat badituzte euskal kazetariak gauzak kontatzeko. Estatu islamikoko kidetzat jotzen dituzten horiekin zer gertatzen den inork ez daki”.♦

Gauza txiki batzuk (13)

Gasteiz. Bi bloke behintzat garbi daude Gasteizko udal taldeen artean: PP (1. indarra 2015eko bozetan) eta udal gobernuko EAJ (3.)-PSE (4.). Bestea EH Bildu (2.)-Hemen Gaude (5.)-Irabazik (6.) osatuko lukete. Bloke bakoitzak bederatzi hautetsi dauzka. Baina botoetan-eta nola daude? PPk 35.722 boto (%30,18), EHB-Hemen Gaude-Irabazik 39.942 (%33,75) eta EAJ-PSEk 34.258 (%28,94). Aurrera begirako aliantzetarako datuak, menturaz.

Jonan Fernandez. Noticias taldeak zekarrenez, Jonan Fernandezek datorren asteazkenean aurkeztuko du Eusko Legebiltzarrean Jaurlaritzako Bake eta Bizikidetzaren legealdiko plana. Fernandez oraindik, ofizialki bederen, ez dute idazkari nagusi (ber)izendatu. Jada igaro dira bi hilabete Iñigo Urkulluk lehendakari kargua hartu zuenetik. Astearteko gobernu bileran izendatuko dute, ala?

Algeciras. Euskal kazetaritzan ibilbide luzea egindako emakume bati elkarrizketa egin diogu goizean. Poltsa prestatzera joan da gero: arratsaldean Algecirasera doa autobusean, hemendik 1.100 kilometrora, euskal preso bat bisitatzera. Jonan Fernandezek-eta gaur-gaurkoz benetan heldu beharreko arazoa: presoen urruntzea.♦

Gauza txiki batzuk (12)

Sortu-Aralar. Patxi Zabaletak astelehenean elkarrizketa batean esan zuen Sortuk eta Aralarrek batera beharko luketela indar zabal batean, eta hara!: sartu da euskal kulturako kide ezagun bat Sorturen egoitza nagusian, Donostian, Zuatzun, eta “Rebekagatik” galdetu du. “Rebeka? Zer Rebeka?”. “Ubera”. “Ez da Sortukoa; Aralarrekoa da, eta EH Bildukoa”. “Ostra!, deskuidatuta etorri naiz hona. Banoa Igarara, Bildura”. Astearte arratsaldean pasatu zen. Neu lekuko.

Arkaitz Rodriguez. Nazional mailan hiru bozeramaile izango ditu Sortuk etziko kongresutik aurrera: Arkaitz Rodriguez (Ekintza Politikoko idazkaria), Miren Zabaleta (Nafarroako arduraduna) eta Pello Otxandiano (Herrigintzako idazkaria). “Nagusiki”, Rodriguez.

Gure Esku Dago. Bazkidetza aldetik pattal samar, eta diru iturrien beharragatik zozketekin hasi zen Gure Esku Dago. 71.262 boleto saldu ditu. Zakar pixka bat bildu du. Sari nagusia Zallara joan da; irabazlearentzat, 30.000 euro. Diru iturri berrietan pentsatzen dabil dinamika, anbizioarekin. Beharko du ahalmen ekonomikorik. Hango batek asteon: “Dago agenda bat!…”.

Sumate. Kataluniaren independentziaren aldeko gaztelaniazko hiztunen plataforma bat da Sumate. Procés hasi berria zela aurkeztu zuten: 2013ko urrian. Laster du beste hitzordu garrantzitsu bat. 700 bazkide baino ez dauzka, baina Kataluniako hedabide publikoek eta bestelako entitateek puztu egin dute. Estrategia bat badela ikusten da.♦

« Older posts

© 2024 Lerro batzuk

Theme by Anders NorenUp ↑