Komunikazioaren erronkak XXI. mendean

Lehenengo unitate didaktikoak ikasleak kokatuko ditu: komunikatzea eta kazetaria zer den ikusiko dute, euskarazko hedabideen historia laburra, hedabide motak eta genero nagusiak… Eta albiste bat idazteko erronka izango dute.

Bigarren unitatean sareen munduan sartuko dira buru-belarri. Informazioa lortzeko erabiltzen diren berri iturriak ezagutuko dituzte, eta komunikabideek Interneten duten presentziaz, fake news-ez eta Adimen Artifizialaren eraginaz jabetuko dira. Amaitutakoan, sareetan zabal daitekeen ikus-entzunezko labur bat egin beharko dute albiste batekin.

Hirugarren unitateak buru osasunean jarriko du fokua. Etenik gabeko informazio jarioak buru osasunean duen eraginaz eztabaidatuko dute ikasleek. Iritzi generoei buruz ere ariko dira, eta gaiari buruz egindako hausnarketa iritzi artikulu batean adieraziko dute.

Laugarren unitatean hitzek duten pisuaz arituko dira ikasleak, hots, hizkuntzaren, idazkeraren eta ahoskeraren garrantziaz. Zalantzak argitzeko BERRIAren Estilo Liburua ezagutuko dute, adibidez, hizkera sexista edo diskriminatzailea saihesteko. Ikasleek eurek erabakitako elkarrizketak eginez landuko dute teoria.

Bosgarren unitatean gutxiengoen erronkak eta gatazkak komunikatzearen garrantzia landuko dute ikasleek, baita ere gaur egun Euskal Herrian eta munduan dauden gatazka sozial eta politiko garrantzitsuenei erreparatzen. Amaieran, kronika edota erreportaje bat sortzeko erronka izango dute.

Amaiaerako unitatea osatzeko eduki informatiboren bat sortu beharko dute ikasleek, taldeka: aldizkari bat sortu, podcast bat edo irratsaio bat egin, edo ikus-entzunezko lan bat grabatu.