Irati Marin, 'Go!azen'-eko aktorea: «Pertsonaia ezberdinak landuz, asko ikasten dut neure buruaz»
Lehen bi ataletan nabaritu da aldaketa Go!azen-en: Basakabi «bigarren aukeren» udaleku bihurtu da, eta erronka ugari dituzte pertsonaiek. Baita Izarrek ere, Irati Martin aktorearen pertsonaiak (Tolosa, Gipuzkoa, 2001). Telesailaren herriz herriko bira hastear den honetan, ofizioaren argi-itzalei buruz hitz egin du.
Ane Insausti Barandiaran
Aldaketa ugari izan dira telesailean. Nola hartu zenituen?
Sorpresaz hartu nuen: ez genuen batere espero aldaketa handi hori. Izarrek ere uda batetik bestera kudeatzeko gauza gehiegi izan ditu, eta horrek ere bere buruarekin gaizki sentitzea ekarri dio. Orduan, haserrea ezin kontrolatu dago batzuetan.
Nola prestatu duzu pertsonaia?
Ibiltzen garen erritmoan, ez dugu denbora asko edukitzen prestatzeko. Gidoiak irakurri, entseguak egin, eta hortik denbora gutxira grabatzen dugu. Grabatu bitartean eraikitzen dugu pertsonaia.
Noiz piztu zitzaizun aktore izateko gogoa?
6 urterekin hasi nintzen lehenengo aldiz antzerki tailerrean, eskolan, eta 12 urtera arte parte hartu nuen. Nerabezaroan albo batera utzi nuen, baina 16 urte bete berritan izena eman nuen Tolosako kultur etxeko antzerki tailerrean, eta orduan konturatu nintzen gustuko nuela eszenatoki gainean egotea.
Go!azen ikusten zenuen?
Filma atera zenean, 8 bat urte neuzkan, eta gogoratzen naiz eskolatik atera eta lagunak elkarrekin joan ginela Leidor antzokira, filma ikustera. Gero, denboraldiak ikusi izan ditut. Gogoan dut apendizitisa izan nuela, ostiral batean ospitalean nengoela, eta han gurasoei esan niela ikusi behar nuela Go!azen-eko atala ETB1en.
Orain zu zaude etxeetako pantailetan. Nola bizi duzu hori?
Hasieran, arraro. Ez digute erakusten nola kudeatu kalean gelditze hori. Urteek aurrera egin ahala, ikasten duzu nola erantzun. Ezetz esaten eta mozten ikasten duzu. Baina pila bat eskertzen dugu egiten diguten harrera.
Telesailak sare bat sortzeko balio du aktoreen artean, ezta?
Daramagun erritmo azkarragatik, konturatu gabe denek bata bestearen alde egiten dugu. Horregatik, lagun handiak egiten gara Go!azen-en. Gainera, aktore gazteentzako erakusleiho bat da, jende askok ezagutzen baitzaitu telesailari esker.
Zer da zure lanetik gehien gustatzen zaizuna?
Pertsonaia ezberdinak landuz asko ikasten dudala neure buruaz. Pertsonaia bakoitzean identifikatzen duzu zugan gertatzen den zerbait. Baina, batez ere, pribilegio bat iruditzen zait pertsonaiak gorpuztea eta kanpora begira ematen dugun mezu hori besteentzako ikasketa bat izatea. Hori da gehien betetzen nauena.
Aurrera begira, zer egin nahiko zenuke?
Gehien gustatuko litzaidakeena antzezten jarraitzea da. Gehiago gustatzen zait antzerki mundua, baina zinemaren eta telesailen mundua ere bai. Horrez gain, badaukat zaletasuna kameraren atzean lan egiteko, eta aktore bezala ez baldin bada, mundu berean jarraitu nahiko nuke lanean: beste aldetik istorioak sortzen edo besteen istorioetan alde artistikoan parte hartzen.
MOTZEAN
- Plater bat? Risottoa.
- Kolore bat? Morea.
- Abesti bat? Olaia Inziarteren Kontatuko banizu.
- Telesail bat? Stanger things.
- Erreferente bat? Ama.
