Nafarrak bere lanean zoriontsuenak dira, Espainiako estatuan eginiko inkesta baten arabera. Nafar inkestatuen %95ek bere lanarekin pozik daudela erantzun dute. Nik beti pentsatu izan dut hau bezalako emaitzak beste inkesta baten emaitzekin batera aurkeztu beharko liratekeela, seinalatuz inkestetan tokian tokiko elkarrizketatuen zenbatekoak gezurra esaten (duela aitortzen) duela. Nafarroan altua behar du portzentaje horrek ere. Edo, bestela, bada hemen nik ulertzen ez dudan zerbait.
Zenbaki gose esnatu naizela aprobetxatuz, hona ekarriko dut berriki agertutako beste estatistika baten ondorio tristea. Lan bera egiteagatik gizonezkoek eta emakumezkoek kobratzen duten diruaren aldea handitu egin da estatu osoan, bereziki Nafarroan, non arrakala deigarria den (Aragoik bakarrik gainditzen du): %29,57koa.
Nire kalkuluak gaizki ez badaude, batez beste, nafar emakumezko batek ia 99 egun gehiagoz lan egin beharko luke urtean, gizonezko bati lan berberagatik ordaintzen zaiona eskuratzeko. Hala izanik ere, baldin badago lanarekin pozik dagoela erantzuten duen emakumezko langilerik, inkestetan sistematikoki gezurra esaten dugu edo digute edo tontoak gara edo lan asko egiteko dago oraindik.
JIRA
Zoriontsuenak
Iruzkinak
Ez dago iruzkinik
Ordenatu