Albistea entzun

BIRA

Fin

Idurre Eskisabel -

2015eko urtarrilak 30

Kopeta tinko duela galdetu dit alabak zergatik ibiltzen garen emakumezkook (neskak esan du berak) gizonak (mutilak) baino pauso laburragoz. Esan berri duena zalantzan jarriz erantzun diot; alegia, itaundu diot nondik atera duen andrazkook ez garela pauso luzez ibiltzen.

Orduan, neure urratsen imintzioak egiten hasi da, eta bere irakaslearenak, eta nire lagun min batenak (emakumezkoak denak): pinpirin-edo dabil, zurrun; joateak baino gehiago urrats bakoitzaren nolakotasunak, egokitasunak, arduratuko balu bezala. Beste norbaitentzako ibiliko balitz legez.

Gizonezkoen txanda ailegatu da gero: aitaren pausokera imitatzeari ekin dio, alboko gelako irakaslearena hurrena, osabarena… zangokada luzez dabil, besoak zintzilik baina indartsu, aurrera begira; iduri luke iristea duela helburu bakar.

Erakustaldiaren ostean, begira-begira jarri eta berriro galdetu dit: ea zergatik ibiltzen garen neskak mutilak baino pauso laburragoz.

Eta halaxe etorri zaizkit burura neure takoiak; amaren eta amonaren, eta amonaren amonaren gona trabaitzaileak; faxa eta gerruntze mugimendu eragoztaileak; jauzika aritzearen arriskuen mehatxuak; zangoak elkarri atxikita eta bizkarra zut esertzeko aginduak; fin ibiltzeko oharrak. Begiradak, begiradak eta begiradak. Beti besteenak.

Ez dakit azalpena nondik hasi.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.