Albistea entzun

LARREPETIT

'Roaming'

Maddi Ane Txoperena -

2016ko irailak 28

Joan den astean eman zuten hedabideek albistea: 2017ko ekainaren 15etik aitzina ez da gainkosturik ordaindu beharko sakelako telefonoaren roaming-agatik Europako Batasunean. Edo, bertze modu batera erranda, ez da gehiago ordaindu beharko norbere sakelako telefono konpainiaren estatutik at egonda dei eta mezuak bidali edo jasotzeagatik.

Zoragarria iruditu zait niri titulua, baina, alde batetik, graziaz eta, bertzetik, amorruz begiratu diet izenburuaren azpian lerrokaturiko azalpenei. Oporretan kanpora doazenentzat onura ekarriko duela, ikasketak atzerrian egiten dituztenentzat praktikoa suerta daitekeela... Eta gero dudak eta zalantzak: telefono konpainien arteko lehia ez ote duen areagotuko, eta halakoak.

Niretzat logikoa den arren, badirudi inork ez diela erreparatu Lapurditik Gipuzkoara eta Nafarroa Garaitik Baxenabarrera etengabeko joan-etorriak egiten ditugun herritarroi. Nik segituan ikusi nion onura roaming-a kentzeari, bada! Akabo bi telefono zenbaki izatearen arazoa, bi sakelako ala bi SIM txartel eduki beharra... Akabo telefonoa nahi gabe «eremuz kanpo» erabiltzeagatik etxera iritsitako faktura kilometrikoak... Akabo nazioarteko tarifa bereziak bilatzeko etorkinen dendetara joan beharra... A, ez... Tamalez, estatu batetik bertzerako deien «nazioarteko» tarifei eutsi eginen diete oraindik, kaka. Baina ez da jada pauso txikia roaming-arena! Euskal Herriko telefono konpainia nazionala sortzen duten bitartean (ez naiz aditua, eta ez dakit egingarria den, baina aspalditik da nire ametsa), horrekin konformatu beharko... Eta orain arte ez zaio inori bururatu?

Sareko hiztegira jo dut, azalpen bila. Eta zaplazteko batez eman dit erantzuna ordenagailuak. Nora ezean ibiltzea omen da ingelesez roaming. Alderrai ibiltzea, harat-honatean. Dirudienez, nora ezean nabil, beraz. Euskal Herria bere osotasunean bizitzeagatik.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...