Albistea entzun

HIZPIDEAK

Amesgaiztoak

Trumpen kapela, sinbolo gradura igoa.
Trumpen kapela, sinbolo gradura igoa. S. THEW / EFE

Mikel P. Ansa -

2016ko azaroak 10 - @peruarenaansa

Hamaika aldiz hil dute hautagaia, eta hamaika alditan zutitu da atzera, indartsuago, azkeneko aldian goreneraino igo den arte. Donald Trumpek lortu du bere amets amerikarra egia bihurtzea, eta «E pluribus unum» (bat, askoren artean) idatzia duen bulego horretako atea ireki du. Hori baita amets amerikarra: askoren arteko bat izate hori bihurtzea, goraino igotzea. Eta zail izango du gorago igotzea Trumpek —bide batez esanda: ingelesez garaipena esan nahi du trump-ek, kartetarako garaipena, baina baita irabaztea eta gailentzea ere; Pence bigarren deitura, berriz, penny txanponak dira ingelesez: nekez imajina liteke izen egokiagorik milioidun batentzat—. Bere buruarentzako amets amerikarra egia bilakatu du, bai, eta, hauteskundeak irabazi berri, amets amerikar hori berregitea izango duela helburu, horixe esan du.

Problema da goiko eskailburu horretan, piramidearen tontor horretan, bakar batentzako lekua besterik ez dagoela. Eta Trumpek jende asko utzi du azpian. Barack Obamak sinboliza zezakeen AEB plural hori hankaz gora jarri du, eta gizon zuriak nagusi diren herrialde bat jarri du agertokian. Herritar asko mespretxatu ditu iritsi den lekura iristeko; emakumeak, hasteko; migratzaileak, jarraitzeko; era guztietako gutxiengoak, bukatzeko. Horientzat ez du amets amerikarrik Trumpek. Antza, ahaztu zaio emigranteen ondorengoa dela —Kallstadtekoak zituen arbasoak, gaur egungo Alemaniakoak; XIX. mendean, herrialdetik legez kanpo alde egin zuen Frederick Trumpek, AEBetara—, eta migratzaile-kolono parrasta batek eraiki zuela amets amerikarraren utopia-gezur hura.

Moderatuko dela diote. Agindutakoetatik egindakoetara, beharbada bai; baina esandakoengatik damutzeko asmorik ez duela ematen du, behintzat —bide batez esanda: puzkerra ere esan nahi du trump-ek, kaleko ingelesean—.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.