m24 - Udal eta foru hauteskundeak

Hasier Arraizek (EH Bildu), gaur, Lezon:

"Pablo Iglesiasek azkenaldian egindako hitzak gaizki hartu ditugu, atsekabez hartu ditugu. EH Bildurekin akordiorik egiteko gaitzezpena, kondena, ezinbesteko baldintza gisa jarri du. Hitz horiek Moncloako eta Ajuria Eneko Itunak gogora ekartzen dizkigute. Badirudi Euskal Herriarekiko PP dela Pablo Iglesiasi agenda politikoa markatzen diona. Hitz zaharrak, Pablo Iglesias, oso zaharrak, politika berririk irudikatzeko. Presaka zabiltza, Pablo Iglesias, presaka eta presaka dabilenak bidean galtzeko arrisku handiak ditu. Ez dakigu, zure azkenaldiko adierazpenak entzunda, zentrora bidaia egiten ari ote zaren ala zuk zeuk duela hilabete batzuk hainbeste kritikatzen zenuen 'kasta' bilakatzeko bidaia ez ote den. Bide horretatik oker zabiltza, Pablo Iglesias, zure bidelagunak ere okerrak izango direlako. Horrek gu gure bidean berresten gaitu. Gu agian nahi baino polikiago joango gara, baina indarrak biltzeko estrategian segitzen dugu, nondik eta nora joan nahi dugun badakigulako. Gu Euskal Bidean berresten gara, guk hemen, Euskal Herrian eta Euskal Herrikoekin bidea egin nahi dugulako".

Xabier Olano EH Bilduren Gipuzkoako ahaldungai nagusiak akusazio gogorra egin du EAJren kontra. Egun Gipuzkoako ogasun zuzendari denak esan du EAJren agintaldian zenbait enpresa "oso handi" ez ikuskatzeko agindua jaso zutela ogasuneko langileek. Gainera, enpresek eurek ere jakinaren gainean zeudela zehaztu du.

Cayo Lara Donostian (eta III). Ustelkeriari buruzko pasadizo bat ere kontatu du Cayo Larak Donostian, berari gertatutakoa: "1979an zinegotzi hautatu ninduten nire herrian [Argamasilla de Alba, Ciudad Real, Espainia], eta festetan auto elektrikoetan ibiltzeko fitxak oparitu zizkidan gizonezko batek. Ezetz esan nion, langile bat nintzela eta nire ahalmenaren arabera ibiliko zirela edo ez gure umeak auto elektrikoetan, eta Kultura zinegotzi izateagatik ez nituela fitxa haiek opari behar. Gizon hark erosi egin nahi ninduen, festetan urtero jar zitzan auto elektrikoak. Garrantzi txikiko ustelkeria kasu bat zen, baina gutxirekin hasten da eta askorekin bukatzen".

Cayo Lara Donostian (II). Kanpaina batean politikarien artean oso ohikoa ez den prentsaurrekoa izan da Cayo Lara IUko koordinatzaile nagusiak gaur Donostian egindakoa, segidan ia ordu erdi batez aritu delako gai bati buruz hizketan (egoera ekonomikoaz); hura sakon aztertu du. Bukaeran aipatu du "hemen" [Espainiako Estatuan] behar dena "erreforma enpresariala" dela, eta IUren proposamena aletu du: iruzurra borrokatu; irabaziak dituzten enpresetan kaleratzeak egiten badira horiek delitutzat hartu; ustelkeriarekin lotutako enpresarien aurkako neurriak hartu; euren langile denei alta eman enpresariek; irabaziak ekonomia "produktiboan" inbertitu, eta ez "espekulatiboan"; sozietateen gaineko bestelako zerga mota bat... Lara ez da prentsaurrekora joan propagandarako mezu hutsalak botatzera.

Cayo Lara Donostian (I). Irabazi koalizioak prentsaurrekoa eman du gaur Donostian. Hizlari: Amaia Martin (Donostiako alkategaia), Arantza Gonzalez (Gipuzkoako ahaldungai nagusia) eta Cayo Lara (IUko koordinatzaile nagusia). Bi aurrenek hartu dute lehendabizi hitza: lau minutu eta erdian aritu dira. Ondoren, Lara: 24 minutuko azalpena. Kordoban esango lukeena esan du, batez ere Juan Rosell (CEOE) eta Rajoy hizpide izanda. (argazkian, Martin, Lara eta Gonzalez, gaur goizean, Donostian).

Harritu naiz Gascok eta batez ere Goiak alkate bezala hartu dutela Izagirre ETB2ko eztabaidan, ez alkategai gisa, hala joan denean.

Yago Mendez Prieto (Galizia, 20 urte) Azpeitiko PPko alkategaiak Facebook-eko bere orria pribatuan jarri du eta, beraz, edukiak ez ditu irekian. Larunbateko BERRIAko erreportaje batean genekarren Mendezek han —eta blogean— Jose Antonio Primo de Rivera falangismoaren sortzailea goresten duela, baita frankismoko Espainiako bandera ere. (irudiak)

Hauteskunde Batzorde Nagusiak ez du onartu PPren helegitea. Ondorioz, Gasteizko Europa Jauregian EH BIlduk egingo du ekitaldia, etzi. PPk ere etzirako eskatua zuen aretoa, baina ezin izango du mitinik egin bertan. Aurretik ere koalizioari eman zion arrazoia Arabako Hauteskunde Batzordeak, PPk kexa aurkeztu bazuen ere.

Irakurleen galderei erantzungo die 12:30ean Joxerra Senar BERRIAko kazetariak. Nola ez, Nafarroako Parlamenturako hauteskundeak izango ditu hizpide. Izan ere, azken legealdian UPNk izandako higadurak egokiera aproposa ekarri du gobernua aldatzeko. Alternatibaren lidergoa hartzeko lehia handia dute EH Bilduk, Geroa Baik eta Ahal Dugu-k.

Garbi dago gehiengo osorik ez dela egongo, eta akordioek baldintzatuko dituzte hauteskundeetako emaitzak. Egoera hori dela eta, Nafarroako bozak aztertuko ditu Joxerra Senar BERRIAko Iruñeko delegazioko Politika eta Ekonomia saileko kazetariak, irakurleen galderei erantzunez.