BIRA

Goazen!

Miren Amuriza -

2017ko urtarrilak 29
Barikuan Bertso Eskolara joan eta non entzun nuen 9 urteko ume bat Latzenen Laztana kantatzen. Zelan ikasi zuen galdetu nion, harrituta; Goazen!-en abesten zutela berak, jarriko zuela karaokea ordenagailuan. Bien bitartean, telesailaren haria kontatu zidaten besteek: barnetegi bateko gazteek musikal bat egin behar dute eta, inportanteena, ahizpa biri mutil bera gustatzen zaie.

Ez dut saioa jarraitu eta halere, karaokean ikusi eta umeei ulertutakoaren arabera, zorrotz kritika nezakeen proiektatzen dituen harreman ereduengatik, estereotipoengatik, erromantikotasunagatik... Kritika nezakeen, parrandan entzuten dugunean, zerbeza botila mikrotzat hartu eta mundua amaitzear balego lez kantatuko ez bagenu Laztana, «korapil»-en o-arekin batera irentsiko ez bagenitu ordu txikietan gogoratzen ditugun printzipio apurrak.

Beraz, oraingoan, aitortu egin behar ETBri asmatu duela: gaztetxoen artean euskarazko produktu bat jarri du moda-modan. Hori bai, datorren denboraldirako, proposamen batzuk gidoilarientzat: doazela institutu batera eta ikus dezatela, bikote harremanetatik harago, gaztetxoek zenbat kezka dituzten; sar ditzatela protagonisten artean traumatizatuta bizi ez den trans bat, etorkin euskaldundu batzuk, nerabe homosexualak... Eta eskatzen hasita, berreskura dezatela Bexamela eta pastela (keinu bat Euskaraokearen belaunaldikooi).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna