Junts per Catalunya alderdiak zaila jarritakoa, are zailago bihurtu zaio Pedro Sanchezi Espainiako Gobernuko presidente karguan jarraitzeko. Espainiako Estatutik kanpo bizi direnen botoak zenbatu dituzte bart, eta emaitzak aldaketa bat ekarri du Kongresuko aulki banaketan. PSOEk eserleku bat galdu du, eta PPk irabazi du. Madrilgo aulki bat zegoen jokoan, eta PPk azkenean hamasei edukiko ditu, eta PSOEk hamar.
Gehiengo osoa lortzeko, 176 diputatu behar dira Kongresuan. Alberto Nuñez Feijook PPko hautagaiak 171 ditu alde, PPren 137ak, Voxen 33ak, eta UPNren bakarra. Sanchezek 121 ditu, eta Sumarrek, ERCk, EH Bilduk, EAJk eta BNGk sostengua ematen diote 171 eskuratuko lituzke. Beraz, Juntsen gutxienez bi baiezko beharko lituzke. Juntsek hauteskundeen emaitzak jakin bezain pronto adierazi zuen ez ziola sostengurik doan emango Sanchezi. Gero, iheslari politikoen amnistia eta autodeterminazio erreferenduma zehazteko eskatuko dutela esan dute.
Madrilgo 16. diputatu kargua Carlos Garcia Adanerok eraman du. Aurreko legegintzaldian UPNren aginduen kontra bozkatu zuen lan erreformaren aurka, eta PPren zerrendetan sartu zen gero.
