Hilabetea: maiatza 2015 (Page 2 of 4)

Azpeitiko PPren alkategaiak pribatuan jarri du Facebook orria

2015-05-15 / Enekoitz Esnaola

Yago Mendez Prieto (Galizia, 20 urte) Azpeitiko PPren alkategaiak Facebook-eko bere orria pribatuan jarri du eta, beraz, edukiak ez ditu irekian. Larunbateko BERRIAko erreportaje batean genekarren Mendezek han —eta blogean— Jose Antonio Primo de Rivera falangismoaren sortzailea goresten duela, baita frankismoko Espainiako bandera ere. (irudiak)♦

Pablo Iglesiasen bi baldintzak

2015-05-14 / Enekoitz Esnaola

BERRIAko analisiaren (2015-5-14) laburpena: Pablo Iglesiasek baldintza bat jarri du EH Bildurekin itunak egiteko: “Terrorismoaren gaitzespena”. EH Bilduk betetzen du hori; Sortuk berak “ekintza terrorista oro” arbuiatzen du bere estatutuetan. Itunetarako “eskubide sozialak” ere ardatz gisa jo ditu Iglesiasek. Beraz, horregatik ere Podemos Ahal Dugu-k itunak egin ditzake EH Bildurekin hauteskunde hauen ondoren Nafarroan, Gipuzkoan… EH Bilduk ere “aldaketa politiko eta soziala” du helburu; baina “hori ez da egun batetik bestera egingo”, baizik eta “pausoz pauso eta herriz herri”. Gehiengo zabalagoak beharko dituela uste du; Podemosek beharko dituen bezala. Noiztik, hori da galdera.♦

‘Zaharra berri Gipuzkoan?’, post scriptum

2015-05-13 / Enekoitz Esnaola

Zaharra berri Gipuzkoan? erreportajean Gipuzkoako Batzar Nagusietako 1991ko inbestidura kontuak ere badaude, EAJ-PSE akordioak Imanol Murua (EA) berriro diputatu nagusi izatea eragotzi zuenekoak, eta artikuluaren post scriptum gisa osagarri izan liteke Joan Mari Torrealdairen Imanol Murua. Gipuzkoako alkate liburuko 174. eta 175. orrialdeetakoa gogoratzea (behean). Xabier Olano EH Bilduren oraingo ahaldungai nagusia bera ere mintzo da orrialdeotan (HBko batzarkidea zen).

Denis Itxaso, post scriptum

2015-05-13 / Enekoitz Esnaola

Denis Itxasoren elkarrizketa dela-eta post scriptum bat. Gipuzkoako PSEren ahaldungai nagusiak dio gustuko politikaria zuela Imanol Murua zena. Bazituela desadostasun ideologikoak, baina estimatzen zituela haren formak. “Politikan ez nuen Imanolekin kointziditu, baina bai gero Firin Faran-en eta”. 1985etik 1991ra izan zen Murua Gipuzkoako diputatu nagusi (Itxaso 1975ekoa da), eta 1991n EAk berriro kargurako proposatu zuenean PSEk (foru hauteskundeetako laugarren indarra) EAJko (hirugarrena) Eli Galdosi emandako botoengatik geratu zen atzera kargura iristeke. Formak.♦

Martin Garitano, post scriptum (eta IV)

2015-05-11 / Enekoitz Esnaola

Martin Garitanoren Kazetari bat agintean, tartez batez erreportajeaz azken post scriptum-a: “Esaten da bidegurutze batean dela Euskal Herria. Nik sarri pentsatzen dut EAJ bidegurutzean bizitzera ohituta dagoela, eta jarriak dituela hotel bat, gasolindegi bat, jatetxe bat, frontoi bat eta eliza bat, eta bertan goxo dagoela. Hala ere, baikorra naiz etorkizunera begira”.♦

Martin Garitano, post scriptum (III)

2015-05-11 / Enekoitz Esnaola

Martin Garitanori buruzko Kazetari bat agintean, tartez batez kontakizunean kabitu ez den hirugarren zera bat, iazko apirilean Gipuzkoa plazan ikurrina handia jartzear zela izandako ezbehar fisikoaz: “Astean zehar gaizki ibili nintzen, tentsioagatik. Goizetan beti kafea hartzen dut, baina egun hartan tila hartu nuen, ez bainengoen oso sano. Ikurrina jartzera nindoala diputaziotik irten eta seko erori nintzen. Erietxera bidean anbulantzian esnatu egin nintzen, eta entzun nuen gidariari nola esan zioten joateko lasaiago, iritsiko ginela-eta. ‘Iritsi?’, nioen neure artean. Pentsatzen zuten larriagoa zela hura. Berehala osatu nintzen”.♦

Martin Garitano, post scriptum (II)

2015-05-11 / Enekoitz Esnaola

Martin Garitanori buruzko Kazetari bat agintean, tartez batez kontakizunean kabitu ez den beste zera bat: “Lau urteotan ez dut askotan jantzi gorbata. Legealdi hasieran erabaki nuena izan zen enbaxadoreak etorritakoan edota unibertsitateko ekitaldi batzuetan jantziko nuela, ez desentonatzeko. Aurreneko aldiz Aieteko Bake Konferentzian jantzi nuen, 2011ko urrian. Eduki izan ditut trajeak etxeak. HBko diputatu bezala Jon Idigoras 1993an Espainiako erregearengana joan zenean —lehen aldia zuen—, neure traje batekin joan zen, batere ez baitzeukan Jonek; gorbata, Bilboko beste adiskide batek utzi zion [argazkian, orduko irudia]. Etxean dut oraindik traje hura”.