Sartu

Izan BERRIAlaguna

Argazkiak

Klima larrialdiaren aro betean

Bizkortzen ari da munduko berotze globala. 2019ko uda bereziki beroa izaten ari da ipar hemisferioan. Copernicus meteorologia zentroak iragarri du ekain-uztailak inoizko beroenak izan direla munduan. Groenlandia urtzen eta Siberia kiskaltzen ari da. Klimatologoek mende erdirako iragarritako joera batzuk jadanik azaltzen ari dira, eta horrek kezka eragin du munduan. Klima larrialdia lehen mailako arazo bihurtzen ari da, baina berotegi efektuko gasen isurketak murrizteko hartutako neurriak oso apalak dira oraindik. BERRIAK klima larrialdiari buruzko udako serie berezia argitaratuko du aste honetan, asteartetik igandera. / 2019-08-09

Argazki Bildumak

Inglefield fiordoan

Ekainean birala egin zen ondoko irudia. Danimarkako Meteorologia Institutuko Steffen M. Olsen ikerlariak egin zuen Inglefield fiordoan. Normalean izoztutako egoten den parajea urez gainezka ageri da, lerari tiratzen dioten txakurrak bertatik aurrera doazela.

2019-08-12

STEFFEN M. OLSEN

Lehortea Somalian

Lehorte latzak gertatzen ari dira munduko hainbat bazterretan. Aspaldikoa da Somalian eta Afrikako adarrean gertatzen ari dena. Irudian Somalilandian (Somalia) ume batek ur bidoi bat darama, lehorteak gogor jotako ingurune batean. Nekazari lurrak eta uztak desagerrarazi ditu muturreko lehorte horrek eta 7,6 milioi pertsona gosez hiltzeko arriskuan jarri ditu.

2019-08-12

Pablo Tosco

Txileko Aculeo lakua

Aurreko irudian esandakoaren harira, Aculeo lakua ageri da lehortuta, Txileko erdialdean. Aspaldiko lehorteak sikatu du lakua, baina aspalditik sumatzen ari den joera bat da, eta uste dute klima aldaketaren erruz, ohiko egoera bihurtu dela hori.

2019-08-12

Jose Caviedes, EFE

Klima larrialdiari erantzuteko greba

Herritarren mobilizazioak ugaritzen ari dira munduan klima larrialdiaren arazoari aurre egiteko eskatzeko. Fridays For Future mugimenduak, esate baterako, munduko mailako grebara deitu du irailaren 20 eta 27rako. Irudian, mugimendu horrek deituta, ikasleen mobilizazio bat Manheimmen, Alemanian, joan den uztailean.

2019-08-12

RONALD WITTEK, EFE

Suteak Siberian

Larrialdi egoera ezarri dute Siberian, azken asteotan han izaten ari diren sute bortitzengatik. Muturreko tenperaturek eta ekaitz lehorretako tximistek eragindakoak dira sute gehienak, eta hondamendi ekologiko handia gertatzen ari dela ohartarazi dute mugimendu ekologistek, basoak erretzeaz gain, suak askatzen duen CO2 kopuru handiagatik. Siberian 2,5 milioi hektarea erre dituzte suteek —Euskal Herriak 2 milioi hektareako azalera du, esate baterako—, Errusiako Gobernuak emandako informazioaren arabera. Greenpeaceren arabera, berriz, gutxienez 4,5 milioi kiskali dira. Iaz ere antzeko egoera gertatu zen: 3,5 milioi erre ziren. Alaskan ere izan dira sute bortitzak.

2019-08-12

ROSCOSMOS HANDOUT

Klima larrialdia deklaratzeko adierazpenak

Munduko hainbat gobernuk eta parlamentuk deklaratu dute klima larrialdia. Europan, besteak beste, Erresuma Batuak eta Frantziak egin dute halako adierazpen ofizial bat. Euskal Herrian ere, Eusko Jaurlaritzak adierazi du klima larrialdian dela mundua. Ekologistak Martxanek kritikatu du Jaurlaritzaren adierazpena eta "ekintza zehatzak" eskatu dizkio.

2019-08-12

Adrian Ruiz de Hierro

Izotz urtzea

Groenlandia ipar mendebaldean satelitez hartutako irudia, zeinean bereizten den azken asteotan izandako izotz urtze handia. Uztail osoan 200.000 milioi tona izotz urtu dira Groenlandian, eta mundu osoko itsasoen maila 0,5 milimetro igo da. Egun bakar batean, abuztuaren 1ean, 11.000 milioi tona izotz urtu ziren, inoizko gehientsuen. Danimarkako erakundeen arabera. Groenlandiako izotz geruzaren %60 gutxienez milimetro batez urtu zen egun bakar batean. Abuztu erdirako inoizko izotz geruzarik meheena du aurten Groenlandiak.

2019-08-11

NASA EARTH OBSERVATORY HANDOUT

Izan BERRIAlaguna

Zure babes ekonomikoari esker, gure funtzioa betetzen jarraituko dugu egunero:
jendearen galdera eta kezkekin bat egingo duen kazetaritza bat egiten.

Izan

 BERRIAlaguna

gezia
✕