Sartu

Izan BERRIAlaguna

Argazkiak

Giza marea, oldarraldiaren aurka

Gutxienez, 70.000 lagun bildu ziren larunbatean, Bilbon, euskaldunen hizkuntza eskubideak babesteko, Euskalgintzaren Kontseiluak antolatutako manifestazioan. Jendetsua izan zen kopuruan, eta zabala gizartearen ordezkaritzari dagokionez. Martxako irudirik esanguratsuenen bidez, manifestazioaren begientzako kronika egin dugu. Argazkiak: Monika del Valle / Foku. / 2023-11-06

Argazki Bildumak

Deitzaileak

Manifestazioaren hasieran eta amaieran Euskalgintzako Kontseilua izan zen protagonista. Erakunde horrek deitu zuen «olatu erreakzionario, atzerakoi eta euskarafoboaren» aurkako martxa. Irudian, Idurre Eskisabel Kontseiluko idazkari nagusia, adierazpenak egiten.

2023-11-04

Alderdien sostengua

Alderdi politikoek ere babesa eman zioten Kontseiluaren deialdiari. Manifestazioan izan ziren, besteak beste, EAJko Itxaso Atutxa, Joseba Egibar (irudian, erdian) eta Xabier Barandiaran; EH Bilduko Maddalen Iriarte, Pello Otxandiano eta Nerea Kortajarena; Sumarreko Lander Martinez (irudian, ezkerrean) eta Andeka Larrea; eta Geroa Baiko Maria Solana.

2023-11-04

Herri jauzia

«Euskararen aldeko jauzi bat behar dugu, eta herri gisa egin behar dugu, bakoitza dagoen tokitik», adierazi zuen EH Bilduko Maddalen Iriartek.

2023-11-04

Bizarra lepoan, eta euskara ahoan

'Euskara salbu ikusi arte ez dut kenduko bizarra'. Gabriel Arestiren hitzak ekarri zituzten eztarrietara, txistulariek 'Egun da Santi Mamiña' doinuekin girotu zutenean martxaren hasiera.

2023-11-04

Gutxienez, 70.000

Manifestazioaren burua Plaza Biribilera iristen ari zenean, orduan atera ziren azken parte hartzaileak Jesusen Bihotzetik. Bilboko Kale Nagusia erabat bete zuten euskaltzaleek. Ertzaintzaren arabera, 70.000 lagun baino gehiago batu zituen protestak.

2023-11-04

Atzera ez, aurrera

Teorian euskara ofiziala den lekuetan euskaldunen aurkako eraso judizialak aregotzen diren bitartean, ofizialtasuna Euskal Herri osoan ezartzeko eskatu zuten ibilbidean. «Hemen gaude, euskararen alde», «Euskal Herrian euskaraz» eta «Euskarari erasorik ez» leloak aireratu zituzten manifestariek.

2023-11-04

Bat-batekotasuna

Euskal Herri osotik heldutako pertsonak bildu ziren Bilbon, eta horietako askok euren leloak eta zeinuak egin zituzten. Kontseiluko antolatzaileek aurretik esana zuten harrituta zeudela herrietan antolaturiko autobus kopuruekin.

2023-11-04

'Zaindu maite duzun hori'

Euskaraz bizitzearen, eta euskalduna izatearen zailtasunen inguruko kanta bat ondu zuen Ruper Ordorika kantariak aspaldi: 'Zaindu maite duzun hori'. Abestia zuzenean kantatu zuen musikariak, eta manifestariek lagundu egin zioten.

2023-11-04

Itun politiko eta soziala

«Olatu erreakzionarioari eusteko ez ezik, aurrera jauzi egin eta euskararen biziberritzeak egun dituen erronkei erantzuteko moduko itun politiko eta soziala», eskatu zuen Kontseiluko buru Eskisabelek manifestazioaren amaieran. Dei berezia egin zien «erakunde eta indar politikoei, akordio berri horren parte eta bultzatzaile izan daitezen».

2023-11-04

Sokadantza, elkarlanerako

Sokadantzaren bidez amaitu zuten ekitaldia, irudikatzeko «pertsonaz pertsona eratu» asmo den «zubi luze bat».

2023-11-04

Justiziaren kontra, kontrapasa

Eskisabelen azken mezua 'Kontrapas' kantuaren bidez ozendu zuten parte-hartzaileek, XVI. mendetik zahartu ez den lelo bat abestuta: «Euskara, euskara, jalgi hadi plazara; euskara, euskara, jalgi mundu guztira».

2023-11-04

Izan BERRIAlaguna

Zure babes ekonomikoari esker, gure funtzioa betetzen jarraituko dugu egunero:
jendearen galdera eta kezkekin bat egingo duen kazetaritza bat egiten.

Izan

 BERRIAlaguna

gezia
✕