Hau galdemina: Eguzkia non ezkutatzen da?
Haurren galderak erantzuteko MANTANGORRIren espazio berria da Hau galdemina! Haurrek bidalitako galderei modu umoretsu eta jostarian erantzungo die Edu Zelaieta idazleak, bi astean behin. Bidali zuen bizitzari buruzko galderak mantangorri@berria.eus helbidera, eta saiatuko gara horiei erantzuten.
Eguzkia non ezkutatzen da?
Eguzkia ez da benetan ezkutatzen; besteak beste, zeruan non ezkutatu ez duelako! (Horretarako badu beste modu bat: zenbait egunetan, auskalo lotsagatik edo gogo faltagatik, hodeien laguntza izaten du zeruan egoteko guk hura ikusi gabe). Kontua da Lurra eguzkiaren inguruan dabilela, bueltaka, zaldiko-maldiko batean bezala. Horregatik, munduaren zati batean eguna denean, bestean gaua da. Hori bai, batean zein bestean, Euskal Herrian nahiz antipodetan, ilunabar bakoitza agur bat da, eta egunsentia, berriz, ongietorri bat. Magia dirudi, ezta? Ba, zeruaren zientzia da. Astronomia!
Eta bada beste gauza bitxi bat. Niretzat behintzat harrigarria, eta egunero gertatu arren aspertzen ez nauena. Eta horretarako berdin da munduko zein bazterretan bizi zaren. Esan egingo dizut: eguna datorren leku beretik datorrela gero gaua. Biak beti leku beretik. Biak beti ekialdetik. Nire kasuan, adibidez, Arabako Lautada izaten da eguzkiari ongi etorria ematen dion faroa, eta agur esaten dion lehena. Beti leku berean, eta beti magikoa.
Eta zure kasuan, non pizten dira lehenik eguna eta gaua?
