Datorren urteko Araba Euskaraz mamitzen ari da, eta gaur aurkeztu dituzte, Gasteizko Armentia ikastolan, logotipoa, leloa, data eta helburuak.
Argantzunen izango da 2018ko Araba Euskaraz, ekainaren 17an. Argantzun Trebiñuko konderrian dago, eta, euskaraz irakasten dutenez, Burgosko administrazioaren laguntzarik ez dute. Horregatik, orain arte ezin izan dute zabaldu Lehen Hezkuntza zikloa, baina Arabako ikastolen aldeko festa baliatuko dute jauzi hori emateko. Irrikitan da aukeratu duten leloa, antolatzaileak gogo biziz baitaude euskaraz bizi nahi dutela aldarrikatzeko, Ikastola handitzeko, Trebiñu Araba dela esateko...
Gurasoek eta herritarrek osatutako lan batzordeak eratuta daude jada, eta ibilbidea ere "ia-ia" finkatuta dago. Kamisetak eta gainerako produktuak ere salgai daude dagoeneko, eta laster on line denda ere zabalduko dute.
Argantzun ikastolak 50 ikasle inguru ditu egun. Lehen Hezkuntza zikloa zabaltzean zifra hori bikoiztea espero dute.
