Gaur goizean emakume baten gorpua aurkitu dute Ordizian (Gipuzkoa), Oria ibaian. Ertzaintzak BERRIAri jakinarazi dionez, 10:30ean agertu da, Aita Urdaneta auzoan, ibaia zeharkatzen duen zubiaren azpian. 63 urteko Ordiziako bizilaguna da hildakoa.
Autopsia egiten ari zaizkio Donostian Auzitegi Medikuntzako Institutuan, eta Ertzaintzak ikerketa abiatu du. Dena dela, BERRIAk jakin duenez, ez dirudi gorpuak indarkeria zantzurik duenik. Ertzaintza kasuaren inguruko berritasunekin ari da lanean.
Beste emakume baten gorpua, Urumean
Atzo gauean beste emakume baten hilotza aurkitu zuen Ertzaintzak, Urumea ibaian. BERRIAri baieztatu dionez, 46 urteko hernaniar baten gorpua da. Ez zuen kriminalitate zantzurik.
Emakumearen autoa Nafarroan aurkitu zuten, eta, desgerpenaren berri izan ondoren, Foruzaingoa bila hasi zen autoa zegoen inguruetan. Ertzainek aurkitu zuten, 23:00etan.
