Gutxienez 20.000 biztanle dituzten udalerrietan, gizarte zerbitzuetara bideratzen den diru kopurua neurtu dute, biztanleko eta urteko. Beraien kontuak publiko egin dituzten 404 udalerri dira ikerketak aztertu dituenak. Guztien artean, Errenteria (Gipuzkoa) da sailkapeneko buru, urteko eta biztanleko 275,74 euroko inbertsioarekin. Hari jarraitzen dio Santurtzik (Bizkaia), 262,55 eurorekin. Hirugarren postuan da Arrasate (Gipuzkoa) 245,80 eurorekin, eta, segidan, Eibar (Gipuzkoa) 225,42 eurorekin.
Ikerketak oinarri hartu ditu udalek Espainiako Ogasun Ministerioari emandako likidazio datuak, abenduaren 28an publiko egin zirenak.
Ikerketa egin duten elkartearen irizpideen arabera, Euskal Herriko lau udal horiek inbertsio bikaintasuna lortu dute zerbitzu sozialen esparruan, beste 27 udalekin batera. Bikaintasun titulua lortzeko, lau baldintza bete behar dituzte: inbertsioa 100 euro baino handiagoa izatea biztanleko eta urteko, aurreko urteko kontuekin alderatuta kopurua ez murriztea, gastu soziala gutxienez aurrekontuaren %10 izatea eta kontuen xehetasunak gardentasun atari batean eskuragarri egotea.
Ikerlariek azaldu dutenez, udalerri batzuetan inbertsioa handia izan den arren, gizarte zerbitzuen arloan sailkatu dituzte esparru horretakoak ez diren gastuak, eta, beraz, zerrendatik kanpo gelditu dira.
Sailkapenaren azken postuetan daude Arroyomolinos (Madril, Espainia) 11,89 eurorekin, Vila-seca (Tarragona, Herrialde Katalanak) 17,00 eurorekin eta Almendralejo (Badajoz, Espainia) 17,04 eurorekin.