Parisko udaletxean, ekitaldi ofizial batean sexu eraso bat egitea leporatuta, ikerketapean jarri dute Luigi Ventura kardinal eta Aita Santuaren Frantziako nuntzioa —nuntzioak Vatikanoaren ordezkariak dira, enbaxadoreen gisakoak—. Urtarrilaren 17an, urte berriari harrera egiteko ordezkari diplomatikoen ekitaldi baten aurretik gertatu zen ustezko erasoa, Le Monde egunkariak berri eman duenez: udaleko langile gazte batek salatu du ukituak egin zizkiola kardinalak —gizonezkoa da salaketa jarri duena ere—.
Udalak eman zion erasoaren berri Fiskaltzari urtarrilaren 23an, eta auzitegietan ikerketa abiatu zuten hurrengo egunean.
74 urte ditu Venturak, eta hamar urte daramatza Frantziako nuntzio karguan. 1978tik dabil Vatikanoaren ardura diplomatikoetan, eta Frantziako ordezkari izan aurretik, Boli Kostan, Burkina Fason, Nigerko Errepublikan, Txilen eta Kanadan aritu izan da.
