Eusko Jaurlaritzak, balorazio mahaiak proposatuta, 2012an egin zen lehiaketa publikoaren ondoren esleitu gabe geratu ziren irrati lizentziak behin betiko adjudikatzea onetsi du. Hamazazpi lizentzia adjudikatu dituzte orain; gainontzeko hamazazpiak, auzitegietako epaiak exekutatuz emanak ziren lehenago, lizitatzaileetako batzuek auzitegien aurrean aurkeztutako helegiteen ondoren —tartean Naiz irratiarenak eta Antxetak Donostialdean lortutakoa—.
Honakoak dira orain eman dituzten hamazazpi adjudikazioak: Bizkaian, Radio7, Eusko Media (Onda Vasca), Sociedad Española de Radiodifusión, RK 20, Berbako Uribe Kostan Irratigintza Euskalduna Sustatzeko Elkartea, Euskal Komunikabideen Hedapenerako Elkartea, Nervitel Sistemas, Ameba kultur elkartea eta Ibaikom kultur elkartea; Gipuzkoan, Eusko Media (Onda Vasca) eta Radio Amanecer; eta Araban, Radio 7, Radio Amanecer, Uniprex, Euskal Komunikabideen Hedapenerako Elkartea, GMC eta Zadorra irrati elkartea. Azkeneko lizitatzaile hori Hala Bedi irrati librearen proiektuari dagokio, eta horrenbestez, Hala Bedi Bi euskarazko irratiak aurrerantzean lizentziarekin emititu ahalko du FMko 95.6 frekuentzian.
Jaurlaritzak duela aste batzuk jakinarazi zuen lehiaketako oker batzuk zuzentzen ari zela.
Ia zazpi urtez luzatu da irrati lizentzien lehiaketaren afera, eta tartean epaitegietako bide luze bat egon da. Aste honetako onespenarekin, aldiz, behin betiko itxi du Jaurlaritzak auzia.