Ezkerreko alderdi subiranistei atea zabalik utzi diete ERC Esquera Republicana de Catalunyak eta EH Bilduk bien arteko akordiora batu nahi badute. Izan ere, Europako bozetara bezala, Espainiako gorteetarako hauteskundeetara ere elkarrekin aurkeztea erabaki dute bi alderdiok. Hitzarmena datorren aste hasieran berretsiko dute bi alderdietako zuzendaritzek.
Hiru puntu nagusi ditu bi aldeek adostutako akordioak: autodeterminazio eskubidearen defentsa egitea Espainiako gorteetan; errepresioa amaitzea, presoak atxeratzea eta iheslari eta erbesteratuen itzulera ahalbidetuz; eta azken urteetako Madrilgo politiken ondorioz galdutako eskubide sozialak berreskuratzea.
Lehendik ere egina dute antzeko akordio bat maiatzaren 26an egingo diren Europarako hauteskundeetarako. Kasu horretan, BNGrekin batera aurkeztuko dira aipatu bi indarrak, eta aldi honetan ere gonbita egin diote Galiziako alderdi subiranistari.
Junqueras epaitegien zain
Europarako zerrendetan Oriol Junqueras aukeratu du ERCk bere zerrendaburu izateko. Generalitateko presidenteorde izandakoa, ordea, preso dago eta epaitegien erabakiaren zain. Ondorioz, litekeena da bozetarako aurkeztu ezin izatea. Hori dela eta, Jose Bove ekologista eta ekintzailea prest agertu da haren tokia hartzeko, "elkartasun keinu gisa".
