Adierazpen gogorrak egin ditu gaur Gipuzkoako Batzar Nagusietan ELA sindikatuko ordezkari Txomin Lasak Gipuzkoako zahar etxeetako gatazka hizpide hartuta. Asteotan bolo-bolo zabaldu da sindikatuak akordiorako oinarri bat erdietsi duela patronalaren zati batekin, eta aldundiak eragotzi egin duela itun hori. Diputazioak ukatu egin du hori —gaur bertan berretsi du mezu hori Gizarte Politiketako diputatu Maite Peñak—, baina kontrakoa erakusten duten "frogak" erakutsi ditu gaur ELA sindikatuko ordezkariak. Ondorioz, "gezurretan" aritzea egotzi dio Peñari. Are gehiago, sindikatuaren hitzak gezurtatu nahian, aldundiak "agiri faltsu" bat ere zabaldu duela azaldu du.
Batzar Nagusietan gatazkari buruzko agerraldiak gaur goizean egin dira eta kanpoan hainbat langilek protesta egin dute. Udazkenetik dago sektorea lan baldintza hobeen eske mobilizatuta, eta hainbat greba egin dituzte. Oinarrizko baldintza batzuk betetzen ez direla eta, mahai itunean ez da eseri ELA sindikatua hilabeteotan —hark du ordezkaritzaren gehiengoa: %60—, baina aldundia jakinaren gainean zela, patronalekin elkarrizketak izan dituztela esan du gaur Lasak, eta "akordiorako oinarri on bat" erdietsi zutela. Posta elektronikoz eta telefono bidez aldundiko buruzagiekin trukatutako mezuak erakutsi ditu horretarako. Batzar Nagusien esku laga ditu.
ELA sindikatuko ordezkariaren aurretik Peñak hartu du hitza. Aldundiak greba egunetarako ezarritako gutxieneko zerbitzuak betearazteko eginkizuna duela gogorarazi du, eta egoiliarren "arta ona" ziurtatu behar dutela. Sindikatuei leporatu die egoilarren senitartekoak "erabiltzea" haien aldarrikapenetarako.