Enpresak

CIAk Huaweiren "arriskuaz" ohartarazi dio Erresuma Batuari

The Times-ek kaleratu du AEBetako inteligentziak hainbat agiri helarazi dizkiola Londresi erakusteko konpainia teknologiko hori Txinako espioitza zerbitzuek finantzatu dutela.

Erabiltzaile bat Huawei denda baten alboan.
Erabiltzaile bat Huawei denda baten alboan. TONI ALBIR / EFE

Xabier Martin -

2019ko apirilak 20

Joan den urtean abiarazi zuen Trump administrazioak Huawei Txinako komunikazio konpainiaren aurkako alarma. Pekinekin lotu zuen, eta haren alde espioitza egiteko tresna zela zabaltzen hasi zen Etxe Zuria. Orain gehiago jakin da Txinaren eta AEBen arteko gerra ekonomikotik banatzea ezinezkoa den auziaz: CIAk hainbat agiri igorri zizkion Erresuma Batuari Huawei eta Txinako Gobernuaren arteko loturak erakusteko. "Froga" horiek erakutsiko lukete Huawei Txinako espioitza zerbitzuek finantzatu dutela, eta interneten nabigatzeko 5G teknologia Pekinen alde balia dezaketela.

Five Eyes Clubeko beste lau kideei helarazi dizkie agiri horiek Washingtonek: Australiari, Zeelanda Berriari, Erresuma Batuari eta Kanadari. Hain zuzen, herrialde horretan atxilotu zuten iaz Huaweiko zuzendaritzako kide bat, eta Pekinek Kanadako hainbat enpresariren atxiloketekin erantzun zuen.

Milaka milioi euroko negozioa jokoan

Kontua da 5G teknologia hedatzen hasi dela Europan bezala munduko beste eremu askotan, eta milaka milioi euroko negozioa dagoela jokoan. Huawei bigarren smartphone marka salduena da jadanik, Samsungen atzetik eta Appleren aurretik. CIAk dio Huaweik 5G teknologia berriaren softwarean sartzeko bide bat eman ahal diola Txinako Gobernuari, atzeko atetik.

Londresek, bitartean, asmoa azaldu du 5G sarea instalatzeko erabakia berraztertzeko. Segurtasun Nazionaleko Kontseiluan ekingo dio gaiari. Londrese seguru jakin nahi du "inor ez dela ahaltsuegi bihurtuko", konpainia teknologikoei erreparatuz, eta Huaweiren inguruko susmoen harira.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna