Bizigiro sailean, artoa eta artoaren bueltako ohiturak izango dituzte hizpide bihar erreportaje nagusian. Horretarako, Maria Jesus Zugarramurdi Artantxuriketan ikuskizunaren sortzailearekin eta Aranoko Ezkerrenborda eta Leontxonborda baserrietako baserritarren lekukotzak jaso ditu BERRIAk.
Goizuetakoa (Nafarroa) da Zugarramurdi. Herri horretan artoa ereiten dute oraindik Eskudero, Loiarta eta Ontxari baserrietan, baina ez askoz toki gehiagotan. XX. mendearen lehen hamarkadatan arto soro zabalak zeuden inguruko herrietan. Aranon (Nafarroa), esate baterako, egun soilik Ezkerrenborda baserrian ereiten dute. Artoa ereiteko prozesuaren ingurukoak ere jasoko ditu erreportajeak.
Bizigiro sailean beste hainbat gai ere landuko dituzte bihar: Gasteizko Matxete erretegia, Sky katearen Gomorra telesaila, Jacques Audiard zinemagilearen The Sister Brothers filma izango dituzte aztergai.
Asteburuko proposamenen artean, Getariko (Gipuzkoa) Antxoa Eguna, Idiazabalgo (Gipuzkoa) Euskal Gaztaren Azoka, Zeanuriko (Bizkaia) erroten ibilaldia eta Itziarko Erromeria Eguna (Gipuzkoa) aipatuko dituzte.