Atzo eguerdian atzeman zuten gorpua trenbidean lanean ari ziren langile batzuek, oso deskonposatuta, Gabriel Delaunay etorbidearen parean, Ziburun (Lapurdi). Sud-Ouest egunkariak berri eman duenez, eskeletoa bakarrik geratzen zen ia. Donibane Lohizuneko polizia etxetik azaldu dutenez, arropetako poltsiko batean pezetak ere bazeuden, eta beraz, Frantziako Poliziak uste du duela urte asko hil eta lurperatutako norbaitena izan daitekeela gorpua.
Poliziak argitu du Bordeleko Mediku Institutura eraman dutela gorpua, DNA probak egin eta datuak desagertutako pertsonen fitxategian dituztenekin alderatzeko. Autopsia egitean, heriotzaren arrazoiak ere jakin ahal izatea espero dute.
