Biziko lau kide atxilotu dituzte gaur Donibane Lohizunen. Mugimendu altermundialistak salatu duenez, Emmanuel Macron Frantziako presidentearen bost argazki lapurtu dituzte goiz honetan Senpere, Arrangoitze, Bidarte, Donibane Lohizune eta Getariko (Lapurdi) herriko etxeetan, eta horrekin lotuta egon litezke atxiloketak; kide gehiago ere egon litezke atxilotuak Biziren arabera. Atxiloketak salatzeko, elkarretaratzera deitu dute 18:00etarako, Donibane Lohizuneko komisariaren aitzinean.
Donibane Lohizuneko komisaldegi aitzinean @bizimugi taldeak antolatu elkarretaratzea, lau kideren atxiloketa salatzeko #bizipic.twitter.com/wZf4kKPUAq
— Euskal Irratiak (@euskalirratiak) 2019(e)ko maiatzaren 28(a)
Orain dela hiru hilabete hasi ziren Macron presidentearen argazki ofizialak "errekisionatzen". Uztaritze eta Miarritzekoak izan ziren lehenak, eta Donibane Garazi eta Maulekoak ere kendu dituzte. Lapurtutako argazkiak eskutan, agerraldia egin zuten Miarritzeko herriko etxearen aitzinean, “Klima, justizia soziala, non da Macron?” galderarekin, klima aldaketaren parean gobernuaren “erantzunik eza” salatzeko. Frantzian ere egin dituzte gisa bereko ekintzak ANV-COP 21 taldekoek, besteak beste.
Apirilaren 5ean, Biziko bost kide Baionako komisariara deitu zituzten, taldean eginiko lapurreta leporatuta. Biziko kideek ez deklaratzea erabaki zuten, eta aske utzi zituzten. Mugimendu altermundialistak adierazi duenez, ondoko asteetan hamar epaiketa izanen dira, argazkien lapurretetan parte hartu duten 36 aktibistaren kontrako. Horietako lehena gaur hastekoa zen Frantziako Bourg-en-Bresse herrian. Bizik erran du aktibista horiei sustengua erakusteko ekintza direla gaurko argazki lapurretak.