Martxoaren 7ko gauerdian greba feministari hasiera emateko Leitzan (Nafarroa) egin zuten lapiko jotzeagatik zigortu dituzte protestan parte hartu zuten bi emakume. Erran.eus webguneak jakitera eman duenez, 600 euroko isun bana bidali die Guardia Zibilak. Mobilizazio hartan bide segurtasuna arriskuan jarri izana egotzi diete, baina protestan parte hartu zutenek adierazi dute martxak ez zuela “ibilgailu bakar batekin ere topo egin”.
Guardia Zibilak kuartela du Leitzan bertan , eta polizien presentzia ohikoa da eskualdean. Feministek salatu dute isunek helburu jakin bat dutela: “Isilik nahi gaituzte; haien kontrolpetik at gelditzen den ororen beldur dira. Beste eredu baten aldeko mugimendu guztiak zapaltzea da haien eginbehar bakarra”. Isunak ordaintzeko diru bilketa egiten ari dira egunotan herrian.
