Usurbilgo Aginaga auzoan egin dute aurten Eskola Txikien Jaia. Orotara 26 eskola txiki daude Gipuzkoako beste horrenbeste herri eta auzotan. Horietako bat da Aginagakoa. Hark 35 ikasle ditu.
Festaren hasiera ekitaldian izan da Eusko Jaurlaritzako Hezkuntza sailburu Cristina Uriarte, Jaurlaritzako Administrazio eta Zerbitzuetarako sailburuorde Olatz Garamendirekin batera. Uriartek eskola txikietan "hobekuntzak" egiteko konpromisoa hartu du.
Zentzu horretan gogorarazi du datorren ikasturtean Arroa (Zestoa), Oikia (Zumaia) eta Alkizako ikastetxeetan azpiegitura izango dituztela. Horrez gain, iragarri du Hezkuntza Departamenduak Angiozarko ikastetxea (Bergara) handitzeko asmoa duela eta Itsasondoko Urkipe auzoan ikastetxe berri bat eraikitzekoa ere.
Eskola Txikiak Bizirik lelopean ospatu dute urteroko jaia Usurbilen. Goizeko hamarretan hasi dira ekitaldiak, eta egun osoan zehar izan da zertan gozatu. Besteak beste, puzgarriak, haurrentzako jolasak eta Sardiña Freskue antzerki emanaldia izan dira.