Iruñeko alkate ardura hartu eta egun gutxira, neurri sinbolikoa hartu du Enrique Maiak. Espainiako armadari eskainiko dio berriro ere hiriko etorbide nagusietako baten izena. Era horretan, indargabetu egingo du Joseba Asiron aurreko alkateak joan den apirilean egindako aldaketa. Asironek Katalina Foixkoaren izena jarri zion aurretik Espainiako Armada izena zuen etorbideari.
Iruñeko Udalak ohar bidez jakinarazi duenez, tramite administratiboak amaitu bezain laster aldatuko diote izena etorbideari. Maiak hartu du erabakia eta bozeramaileen batzordeari jakinarazi dio gaur goizean.
Udalak azaldu du etorbidea 1960ko hamarkadan egin zenetik Espainiako armadari "aitortza" egiteko jarri zitzaiola indar armatu horren izena, Iruñeko gotorlekuaren inguruko lurrak eman zituelako.
Oharraren arabera, udalak 'Katalina Foixkoaren erronda' izena jarriko dio Nafarroako Artxiboaren eta Nafarroako Erreinuaren Lorategien plazaren iparraldeko bideari.
