Espainiako armadarekin itzuli da Elkano Getariara

Armadaren ontzia Getariako portuan dago, eta bisitak antolatu dituzte. Udalbatzarra aurka agertu da; protestak izan dira herrian. Ongi Etorri Errefuxiatuak plataformak igande eguerdian egingo du berea

Urteurren ekitaldien aurkakoen pankartak eta ikurrinak, Getarian. ARITZ LOIOLA (FOKU)
jokin sagarzazu
2019ko uztailaren 6a
00:10
Entzun

Munduari bira eman zion lehen marinela, kolonizatzaile bat, ala biak batera. Azalpen horiek eta gehiagok deskriba dezakete Joan Sebastian Elkanoren figura historikoa (Getaria, 1476?; Ozeano Barea, 1526). Haren izenaren atzean historia bezainbeste izan daudelako. Elkanoren inguruan kontakizunen borroka hori irudikatzen ari dira asteburu honetan haren jaioterrian, Getarian (Gipuzkoa), ekitaldi ofizialen aldekoek eta protestan ari direnek.

Elkanok Gaztelako koroaren zerbitzura munduari bira eman zioneko hasieraren 500. urteurrena gogoratzeko ekitaldi ugari antolatu dituzte; tartean, Getariako marinelaren izena duen Espainiako armadaren itsasontzia dago han, eta horrek, besteak beste, hainbat herritarren eta Getariako Udalaren haserrea eragin du.

Ontzia larunbat arratsaldean iritsi da Getariako portura. Goizean irten da Getxotik (Bizkaia), eta hara itzuliko da astelehenean —han ere bisitatu ahal izango da—. Elkanoren Zeruertza du izena programazio ofizialak; sustatzaileen artean daude Gipuzkoako eta Bizkaiko foru aldundiak eta Espainiako Armada. Aste barruan hainbat ekitaldi egin dituzte; adibidez, EHUren Uda Ikastaro bat Donostian; halaber, umeentzako animaziozko film bat aurkeztu dute.

Ikusmina eta haserrea

Getarian lehen ekitaldiak larunbatean egin dituzte, eta igandean jarraituko dute. Karpa handi bat jarri dute portuan. Hitzaldiak, haurrentzako tailerrak eta beste izango dira han. Ejertzitoaren ontzia ere bisitatu ahal izango da, beste hiru barku tematikorekin batera; antolatzaileek azaldu dutenez, sarrerak agortu dira. Jendetza espero dute asteburu osorako, eta errepide nagusia moztuta egongo da Zumaia-Zarautz noranzkoan. Autobus zerbitzua jarri dute Zumaiako Arroa auzotik eta Zarauztik.

Ekitaldiak zeresana eman du herrian. Horrekiko desadostasuna agertzeko, Etxeu Nahi taldea sortu dute. Elkanoren irudia goratzeaz gain, "espainiar inperialismoa zuritzea" leporatu diete antolatzaileei. Egun osoko egitaraua prestatu dute larunbaterako. Igandean, Ongi Etorri Errefuxiatuak plataformak bat egingo du protestekin. Eguerdian, performance bat egingo dute hondartzan eta elkarretaratzea plazan.

Getariako udalbatzarreko alderdiek —EH Bilduk eta EAJk— ere plazaratu dute armadaren presentziarekiko desadostasuna, horrek duen "karga sinbolikoagatik". Euskal Herriaren nazio izaera aldarrikatu dute.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.