Egunotan Iruñean izandako sexu eraso bat ikertzen ari da Polizia. Hala jakinarazi du Enrique Maia alkateak, Babes Zibileko kideekin izandako bilera baten ostean. Biktimak salaketa jarri eta ordu gutxitara atxilotu dute gizona. Maiak, halere, zuhurtziaz jokatzeko eskatu du. Adierazi du erasoa "abusu" bat izan dela ustez, eta ez dutela "beharrezkotzat" jo sexu erasoen aurkako protokoloa martxan jartzea.
Ez da azken egunotan izan den eraso bakarra. Emakume bati sexu erasoa egin zioten larunbat goizaldean, Erandion (Bizkaia). Erasoaren harira, 41 urteko gizon bat atxilotu zuen igandean Ertzaintzak, auto baten barruan emakumeari eraso egitea egotzita. Udalak irmoki salatu du erasoa, eta bihar egingo den elkarretaratzera joateko dei egin die herritarrei. Bihar arratsaldean izango da, 20:00etan, Erandioko metroaren Altzaga geltokian. Udalak elkartasun osoa adierazi dio erasoa pairatu duen emakumeari, eta beharrezko laguntza eskaini die berari eta familiari.
Eraso hauez gain, Espainiako Poliziak Alemanian iaz izandako bortxaketa baten ustezko egilea atxilotu du Antsoainen (Nafarroa). Alemaniako Poliziak igorria zuen hura atxilotzeko agindua, eta Europolek Iruñean egon zitekeela ohartarazi zien poliziei. Atxilotua 27 urteko gizon bat da. 2018ko irailean Munichen (Alemania) neska bat bortxatu izana leporatzen diote. Horrez gain, poliziek uste dute zerikusia duela Torrejon de Ardozeko (Madril) diskoteka batean emakume bati egindako beste sexu eraso batekin.