Kalera aterako dira. Euskararen Foru Dekretua kamustu zuten epaiei aurre eginen diete euskararen aldeko gizarte eragileek, Kontseiluan bilduta. Heldu den asteko larunbatean izanen da protesta, hilak 19, 12:00etan, Nafarroako Gobernuaren egoitzaren aurrean. Kontseilua osatzen duten elkarte ezberdinek egin dute deialdia.
UGTren eta salaketa jarri zuten gainerako sindikatuen jarrera kritikatu du Kontseiluko idazkari nagusi Paul Bilbaok: "Oso larria iruditzen zaigu jokabide hori: helegitea jarri diete euskararen dekretuko puntu guztiei, baita euskararen ikusgarritasunari buruzkoei ere, orain arte zalantzan jartzen ez ziren gauzei".
Hala ere, Bilbaok azpimarratu du epaiak ez duela debekurik ezartzen. Hortaz, euskara meritu gisa aintzat hartzea edota bide seinale eta paisaia linguistikoan ikusgai paratzea "borondate politiko kontua" besterik ez dela: "Iruñeko Udalak dagoeneko esan du bere ordenantza berria egokituko duela, epaiaren irizpide murriztaileetara. Eta Nafarroako Gobernuak zer egingo du?".
Kontseiluko idazkari nagusiak gaineratu du, halaber, gisa honetako epaiak kaleratzen direla "Euskararen Legeak hori ahalbidetzen duelako". Hori dela eta, "gogoeta egiteko" eskatu die Nafarroako talde politikoei eta agintariei: "Ez genuke ulertuko, atzera ere, garai bateko hizkuntza politika ilunetara itzultzea". Hori guztia, baina, prentsaurrekoetan ez eze, "kalean" aldarrikatu behar dela uste du Bilbaok.
