Emakumezkoen Lehen Mailako bigarren itzulia hasi da asteburu honetan, eta Euskal Herriko bi taldeek gaur jokatu dute, biek ere etxean. Realak irabazi egin dio Valentziari (1-0), eta Athleticek berdindu egin du Levanteren aurka (1-1). Horrenbestez, sailkapenean aldatu egin dituzte lekuak bi taldeek: txuri-urdinak bosgarren dira, eta zuri-gorriak, seigarren.
Zubietako partidan, Realak lanak izan ditu sailkapeneko atzealdean dabilen Valentziari irabazteko. Garaipenerako gola Nahikarik sartu du, 70. minutuan.
Lezaman, hirugarren sailkatua izan du kontrario Athleticek, eta ozta-ozta salbatu dute puntua etxekoak, 95. minutuan berdindu baitu partida, Sierraren gol bati esker. Corredeirak aurretik zeukan bere taldea 14. minututik.
