Erregaien prezioaren eragina ekonomiaren sektore guztietara hedatzen da, eta, nola ez, salneurri horietako gorabeherak kontsumo prezioetan ere antzematen dira. Otsaileko KPIan ere igarri dira erregai merkeagoak, baina garraioaren alorrean baino gehiago, etxebizitzaren inguruko prezioetan, batez ere berogailuetarako gasolioaren salneurriarengatik.
Alor horretako prezioak eta komunikazioen sektorekoak izan dira inflazio tasa %1etik behera gelditzeko arrazoi nagusia. Izan ere, otsail honetan iaz baino nabarmen gutxiago garestitu dira telefonia prezioak. Otsailean, Hego Euskal Herriko urte arteko inflazio tasa %0,7an kokatu da; urtarrilean, %1,1ean zegoen.
Herrialdeka, Bizkaiko tasa da handiena, %0,8ra apaldu den arren; Araban eta Gipuzkoan %0,7an gelditu da inflazioa; eta portzentaje apalena Nafarroak du, %0,6arekin.
