Lan gatazka

ITP Aerok 194 langile kaleratu nahi ditu Zamudion

Ezaguna zen ITPk kaleratzeak egingo zituela taldeko lantegi guztietan, baina Zamudion zer-nolako eragina izango duen jakinarazi diete gaur goizean sindikatuei: lantaldearen %15 sartuko dute kaleratze espedientean.

ITP Aero enpresako langbileen manifestazioa, aurreko larunbatean.
ITP Aero enpresako langbileen manifestazioa, aurreko larunbatean. JESUS ZORRILLA 7 EFE Tamaina handiagoan ikusi

Xabier Martin -

2020ko irailak 16

Albiste txarrak Zamudioko ITP Aeroko lantaldearentzat. BERRIAk jakin duenez, zuzendaritzak 194 behargin kaleratu nahi ditu kontratuak hausteko erregulazio dosier baten bidez. 1.269 langilek dihardute aeronautika taldearentzat, eta lantalde horren %15,3 sartuko litzateke espedientean. ELA sindikatuak egunkari honi aurreratu dionez, kopuru horiek berretsiko dizkiete sindikatuei datozen minutuetan agiri idatzien bidez. Langileen ordezkariak eta zuzendaritza bilera batean daude Zamudion, eta espero zitezkeen aukeren artean «okerrena» jakinarazi du zuzendaritzak: 194 kaleratze.

Kaleratzen horietako gehienak, 101 hain zuzen, ekoizpenaren atalean gertatuko lirateke, eta beste 93, bulegoetan. Kaleratzeen kopuru zehatzak mahai gainean daudela, ELA sindikatuko ordezkariek «mobilizazioen garaia» dela esan dute, eta dagoeneko abiatu den lau eguneko greba sortan parte hartzeko garaia. Beste sindikatuek ez dute bat egin lanuzte deialdiekin. Atzo izan zen lehena; bihar da bigarrena, eta datorren asteko asteartean eta ostegunean izango dira beste biak. Ikusteko dago gaurko albisteen harira, greba deialdien egutegia aldatuko ote den.

«Espero dugu, kaleratzeak mahai gainean diren honetan, beste sindikatuek bat egitea ELAk deitutako grebarekin», esan du ELAko ordezkariak. Edonola ere, sindikalistak garbi utzi du ez dutela onartuko kaleratzeko dosierra, eta, beraz, mobilizazioarekin lotutako garaia abiatu dela.

Iragarritako kaleratzeak

Hegazkinentzako motorrak eta osagaiak ekoizten dituen Bizkaiko enpresak jakinarazi zuen uztailaren hondarrean guraizeak aterako zituela sektorearen krisiari erantzuteko: aurreratu zuen lantaldearen %15 murriztuko duela, eta enplegua mantentzeko gaur egun indarrean dauden ezohiko neurriak amaitzen direnean egingo zuela hori; udaren ondoren.

Rolls-Royce multinazionalaren jabetzakoa da ITP, eta guztira 4.000 langile inguru ditu Euskal Herrian eta beste sei herrialdetan: neurriak seiehun laguni eragingo lieke. Euskal Herrian lau planta ditu, Bizkaian denak: Zamudion, Derion, Sestaon eta Barakaldon. 1.900 behargin, guztira. Kontua da Rolls & Royce harremanetan jarri dela AEBetako Carlyle, Blackstone eta KKR funts handiekin, ITP Aero saltzeko, Erresuma Batuko prentsak argitaratu duenez, eta konpainiak berak ez du ukatu informazio hori. Esan du ez duela erabakirik hartu ITPren inguruan.

Sener euskal ingeniaritza konpainiak Rollsekin batera zabaldu zuen ITP, 1981ean, eta, 2016an, Erresuma Batuko taldeak Senerren %53,1 erosi zuen; geroztik, Rolls & Royceren jabetzakoa da ITP.

Aeronautika sektorea gogor jotzen ari da pandemiak eragindako krisi ekonomikoa, hegaldiak erdira baino gehiagora murriztu baitira mundu osoan. Hegazkinak lurrean daudenez, aire konpainiek eten egin dituzte inbertsioak, eta, hegazkin berriak saltzen ez direnez, sektorea gain behera doa. «Hainbat aukeraren hasierako zikloan gaude», esan du Rollseko arduradun batek; «balantzea sendotu behar dugu, baina ez dugu oraindik erabakirik hartu, gaur egun gure finantza egoera irmoa delako oraindik ere» .

Epaitegi batek aldi baterako erregulazioak baliogabetu ditu

ITP Aerok Sestaon eta Barakaldon dituen lantegietan ezarritako aldi baterako erregulazio espedientea baliogabetu du Barakaldoko epaitegi batek, LABek, CCOOk eta UGTk ezagutarazi dutenez. Irailaren 3an egin zen epaiketa langileen kontratuak eteteko formula horren aurka, eta epaileak ebatzi du ez dagoela arrazoi objektiborik aldi baterako lan erregulazio bat aplikatzeko. Horrek esan nahi du behin-behinean etendako kontratu guztiak indarrean jarri beharko dituela enpresak, eta, gainera, jaso gabe geratu diren soldatak pagatu beharko dituela.

ITPk udan iragarritako kaleratzeen aurrekoak dira Ezkerraldeko galdarategietan ezarritako aldi baterako dosier horiek, baina bertan behera utzi beharko ditu berehala. Horrek eragingo luke kaleratze prozesua azkartzea.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Bi pertsona maskarak soinean daramatzatela, autobusean. ©JUAN CARLOS RUIZ / FOKU

Lau gako asintomatikotasunaz

Arantxa Iraola

Kutsatu guztiek ez dituzte izaten sintomak. Adituek diote COVID-19an positibo emandakoen erdiek-edo, birusa izan arren, ez dutela batere sintomarik. Horrek zaildu egiten du izurriaren kontrola.

Herritar batzuk kalean maskara jantzita, Frantzian. ©CAROLINE BLUMBERG / EFE

Birusaren bigarren oldarraldia

Jone Bastida Alzuru

Kasuek ugaritzen jarraitzen dute munduan, eta hainbat herrialdek neurriak zorrozteko erabakia hartu dute. Israelek joan den ostiralean indarrean sartutako itxialdia gogortu du

Langile batzuk kaleak desinfektatzen, atzo, Azkoienen (Nafarroa). ©Idoia Zabaleta / Foku

Bigarren egunez, 800 kasu baino gehiago atzeman dituzte Hegoaldean

Uxue Rey Gorraiz

Osakidetzak jakinarazi du 9 urteko ume bat hil dela, birusa izanda. Positiboek gora egin dute Araba, Bizkai eta Gipuzkoan; Nafarroan, ez

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna