Arabako zahar etxe pribatuetako eta etxebizitza komunitarioetako langileek greba egin dute gaur, iragarritako hiru lanuzteetatik lehenengoa –azaroaren 11n eta 25ean ere antolatu dute–. ELA, LAB, UGT eta CCOO sindikatuek deituta egin dute greba, lan hitzarmen propio bat eskatzeko. Izan ere, langileek probintzia mailako hitzarmena negoziatu nahi dute, baina, salatu dutenez, oraindik ere negoziazio mahaia irekitzeko eskaeraren berririk ez dute. Sindikatuek diote 2019ko urtarrilean mobilizazioekin hasi zirenetik ez dela aurrerapausorik eman, eta Arabako Foru Aldundiari leporatu diote auzian «pasibotasunez» jokatzea. Adinekoen egoitzetako langileek «zainketen prekaritatea» eta sektoreko lan baldintza eskasak gaitzetsi dituzte, eta salatu horiek are okerrago daudela koronabirusaren pandemiaren eraginez.
Eusko Jaurlaritzak %100eko gutxieneko zerbitzuak ezarri ditu gaurko greba egunerako, eta sindikatuek salatu dute Arabako egoitzetako langileen greba eskubidea «%100 eta larriki urratzen» duela horrek. «Erizain laguntzaileek, garbitzaileek, erizainek eta medikuek ezingo dute grebarik egin, eta horrek agerian uzten du sektoreak gutxienekoetan lan egiten duela urte osoan».
Greba egunarekin batera, langileak kalera atera dira Gasteizen goizean protesta egitera. Giza katea osatu dute Plaza Berritik Arabako Foru Aldundiaren egoitzaraino. Arratsaldean, berriz, manifestazio bat egingo Andre Maria Zuriaren plazatik abiatuta, 18:30ean.