Goiz da jakiteko Pfizer eta BionTech konpainiek garatutako txertoak zein eragin izango duen pandemiaren aurkako borrokan, baina giltzarri gisa ikusi dute finantza merkatuek, igoera ikusgarriekin hartu baitute berria. Europako 300 konpainia handienak biltzen dituen indizeak, ia %4 egin du gora, %5,2 Frankfurtek, %7,6 Parisek, eta %8,5 Madrilek.
Normala denez, txertoaren bultzatzaileen akzioek egun ona izan dute —Pfizer %10 ari zen igotzen arratsaldean, eta %13,7 BioNtechek—, baina %15etik gora berreskuratu dute turismoarekin zerikusia dutenek. Behera, berriz, Astra Zeneca botikagilea (-%2) —lehian dago Pfizerrekin lehen txerto eraginkorra merkaturatzeko—, eta Zoom Internet bidezko bideo konferentzien hornitzailea (-%12) .
