Espainiako Osasun ministro Salvador Illak Kataluniako irrati batean adierazi duenez, 30 milioi herritarri txertoa jartzeko asmoa du Madrilek. Asteartean onartuko du Gobernuak plana, eta agintariaren arabera, ez da derrigorrezkoa izango.
30 milioi herritarrei txertoa jarrita, «ehuneko handi bat beteko litzateke», esan du Illak. «Ez dakit helduko garen. Ziurrenera populazioaren erdira iritsiko gara».
Plana erkide autonomoekin landu duela azaldu du ministroak. Dagoeneko 13.000 txertogune dituztela adierazi du. Sare horrekin, «erritmo bizian, eraginkorrean eta berme ororekin txertatu ahalko dela gaineratu du».
Illak esan du adituek ez dutela gomendatzen txertatzea baitezpadakoa izatea, derrigorrezkotasunarekin «nahi denaren kontrakoa lor baitaiteke». «Egia azaldu behar diegu herritarrei». Herritarrak behartzea legez egin dezaketela, ohartarazi du, «baina ez dugu egingo».
Itxaropena bai, euforiarik ez
Txertaketa plana iragarri zuen atzo gauean Pedro Sanchez Espainiako Gobernuko buruak. Bere administrazioaren menpeko populazioaren «zati handi bat» 2021eko lehen erdirako txertaturik egotea aurreikusten zuela esan zuen. Plana irailean landu zutela azaldu zuen. «Prest gaude». Etorkizuna itxaropenez ikusten duela esan zuen, «baina euforia zuhurtziarekin orekatu behar dugu».