Ostalariek euren protestetan erabilitako kartelak erakutsiz egin dio deia Iker Casanova EH Bilduko legebiltzarkideak Iñigo Urkulluri. Batetik, orain bi aste Alemaniako laguntza ereduaz egindako adierazpen «mingarriak» zuzentzeko eskatu dio; bestetik, datuak eman ditu sektorearen« egoera errealaz», eta azkenik galdera egin du, ea Jaurlaritzak neurri nahikoak aktibatuko dituen «ostalaritzaren egoera kritikoari aurre egiteko».
Casanovak azaldu du orain arteko neurriak ez direla sektorearekin adostu, «eta ez dira sektoreak eskatzen dituen neurriak». EH Bilduren ustez, egoera kritikoa da: «ez zarete oraindik jabetu sektorea pairatzen ari den egoera larriaz. Oraindik garaiz gaude, neurriak hartzeko sektorearen zati bat salbatzeko, beste bat dagoeneko desagertu delako. Mugitu zaitezte».
«Osasun larrialdian gaude, eta arlo guztietan behar dira laguntzak», erantzun du Urkulluk. «Zuk erreskate plan bat eskatzen duzu, eta nik esango dizut erreskate plan hori martxan dagoela; martxoaren 24an abiatu genuen». Urkulluren arabera, erreskate plan orokor bat dago,« ostalaritzari ere erantzuten diona». Horrez gain, ostalarientzako laguntza bereziak ere onartu direla nabarmendu du, eta azaldu aste honetan jada 7.230 negoziok eskatu dituztela 4.000 euroraino iritsi daitezkeen laguntzak. Sektoreak 13.000 bat establezimendu eta 55.000 langile ditu.
EH Bilduren jarrera ere gaitzetsi du lehendakariak: «Zuek ezkutatu egiten duzue Aste Santuan presio egin zenutela ostalaritza guztia ixteko, merkataritza, hezkuntza, kultura, enpresak... Herrialdearen erabateko itxiera proposatu zenuten, ostalaritzatik hasita. Leporatu gintuzuen ekonomia lehenesten genuela, pertsonen gainetik. Egoera horri nola eutsi galdetutakoan, irtenbide erraza eskaini zenuten: AHT gelditu eta zergak handitu. Zuek oraintxe babestu dituzue estatuko aurrekontuak, AHT gelditu gabe eta zergak handitu gabe; eta babestu dituzue ostalaritza laguntzeko inolako neurririk gabe».
