Bukatu zaio lehortea Athletici. Ura aurkitu du gaur gauean San Mamesen. Urrea, zehatzago eta nabarmenago esanda. Izan ere, Huescari irabazteko ez du gauza handirik egin. Baina ondo aritu ez eta irabazteak berdin balio du, eta lau partida garaipenik lortu gabe egon ondoren, gozotasuna itzuli da talde zuri-gorrira.
Azken bederatzi minutuetan eskuratu ditu hiru puntuak Gaizka Garitanoren taldeak. Aurreneko gola Kenan Kodrok egin du, 86. minutuan eta penaltiz. Aurrelariari berari egin dio area barruko falta Pulidok, eta ez du hutsik egin jaurtiketan. Urtebete eta egun bat zeramatzan golik sartu gabe partida ofizial batean Kodrok. Bigarrena Unai Nuñezek egin du, 91. minutuan. Korner batean, buruz, bakar-bakarrik egin du errematea area txikian.
Aurretik, lehen zatian, kanpotarrak hobeto moldatu dira. Bigarrenaren lehen erdian hartu du aginte makila etxeko taldeak, baina beste askotan bezala, aurkariari min handirik egiteko abileziarik gabe. Hori gutxi ez, eta gainera, Huescak aurrera egin du bigarren zatiko bigarren erdian, eta erraz antzean heldu da Unai Simonen area ingurura. Baina hortik gora ez du ezertan asmatu. Athleticek bai azkenera, eta hor erabaki da gaurko partida.