Ez da egun bakarreko kontua. COVID-19aren transmisioa gorantz ari da Hego Euskal Herrian, eta aldagai guztietan nabari da. Atzo, 9.055 PCR eta antigeno proba egin zituzten Osakidetzak eta Osasunbideak, eta, horietatik, 627k eman zuten positibo, bezperan baino 177 gehiagok. Positibo tasa %6,9 da oraintxe.
Jaiegunetako parentesiaren ostean, eginiko test kopurua nabarmen igo zen atzo. Horren ondorioz, Nafarroan apaldu egin da positibo tasa (%10,6tik %6,5era), baina handia da oraindik. Kasuak ere ugaritu egin dira herrialde guztietan: 82 atzeman dituzte Araban (bezperan baino 43 gehiago); 228 Bizkaian (40 gehiago); 169 Gipuzkoan (37 gehiago) eta 147 Nafarroan (59 gehiago).
Osakidetzak jakinarazi du 43 pertsona ospitaleratu dituztela COVID-19arengatik.
