Nafarroako Gobernuak eta Eusko Jaurlaritzak jakinarazi dute atzo COVID-19a atzemateko egindako proben berri; 11.220 test egin zituzten guztira, eta %8,7 positiboak izan ziren. 985 kasu diagnostikatu zituzten denera. Herrialdeka, kasurik gehienak Bizkaian atzeman zituzten, 426; Gipuzkoan, 243; Nafarroan, 159; Araban, 151.
Erietxeetan ere datuak gora doaz. Eusko Jaurlaritzako Osasun Sailak eman ditu azken datuak horren erakusgarri dira: ospitaleetan 682 gaixo zeuden koronabirusak jota, larunbatean baino 24 gehiago. Azaroaren 24tik ez zen horrelako okupaziorik ospitaleetan. Eta bilakaera argia da Eguberrietatik hona; urtarrilaren 7an 359 paziente zeuden erietxeetan.
Osasun Sailak zabaldu dituen datuei begira, 100.000 biztanleko kasuen intzidentzia metatuari erreparatuta ere, argia da gorako joera: Bizkaian 602,5ekoa da, eta Araban 537,8koa. Gipuzkoa bakarrik geratzen da oraindik 500eko muga horretatik kanpo: 475,5 kasukoa baitu tasa hori. Gasteiz eremu gorrian sartu da, eta han ere, Bilbon bezala, ostatuek itxi egin beharko dute.