Dena aldatu, sistema arrakalatu lelopean hartuko ditu karrikak Martxoaren 8an Euskal Herriko mugimendu feministak. Gaur aurkeztu dituzte mobilizazioak Donostian, eta nabarmendu dute inoiz baino beharrezkoagoa dela karrikara ateratzea. Bilbon, Baionan, Donostian, Gasteizen eta Iruñean izango dira manifestaziorik handienak, baina, hirietan ez ezik, Euskal Herriko hainbat herritan ere egingo ditu ekitaldiak mugimendu feministak. Ekitaldi denetan osasun neurri guztiak betetzeko deia egin dute.
Bizitzak erdigunera eramateko eskatu du mugimendu feministak, eta salatu du oraingoa ez dela osasun krisia soilik: «Krisi hau ez zen pandemiarekin hasi, eta Euskal Herriko mugimendu feministan orain ez gara isilik eta geldi egongo». «Sistema kapitalista, heteropatriarkal eta arrazista arrakalatzeko, feminismoan antolatu eta kolektiboki borrokan jarraitu behar dugu», nabarmendu du Irati Ezkerra mugimendu feministako kideak, eta horretarako kaleak hartu beharra azpimarratu du.
Gobernuek kapitala lehenetsi dutela salatu du mugimendu feministak, eta emakumeen kontrako erasoek ez dutela etenik: «Abusu poliziak eta instituzional arrazistak jasan ditugu, ehunka kide kaleratuak izan dira, milaka emakumek lan merkatua utzi behar izan dute zaintza lanengatik, indarkeria matxistak ez du etenik, eta krisialdiak eragin zuzena izan du eremu feminizatuetan, bereziki egoera irregularrean dauden emakume langileen eremuan».
Mugimendu feminista egunetik egunera «gaurkotzen» eta «indartzen» ari dela nabarmendu du Ezkerrak: «Gure arteko arrazakeria bistaratu eta landu dugu, herri eta auzoetan aliantza sareak ehundu ditugu, borrokarako espazioa zabaldu dugu, eta mundu mailako ekintzetan parte hartu dugu». Horregatik, karrikan egongo direla nabarmendu du Ezkerrak: «Euskal Herrian eta Euskal Herritik dena aldatzeko lan egingo dugu, eta, Martxoaren 8an, erdigune eta bazter guztietan mobilizatuko gara"
Mobilizazioak
Baionan, goizean aterako da mugimendu feminista karrikara: 12:00etan hasiko da manifestazioa, ospitaletik. Gainontzeko hiriburuetan, arratsaldean aterako dira karrikara. Donostiako mobilizazioa 18:30ean hasiko da, Antiguako tunelean. Gasteizen eta Bilbon, 19:00etan izanen dira manifestazioak. Gasteizkoa San Anton plazatik aterako da; Bilbokoa, Jesusen Bihotzetik. Iruñean, berriz, 20:00etan izango da protesta, eta manifestazio bakarra izan beharrean, auzo bakoitzean izango dira mobilizazioak.